May 25, 2018/ Todays e-paper

লমগী চয়েৎনবা ভিজিলেন্সনা থিগৎপগী থবক য়াংশিন্নবা হোৎনসি


13th May 2018

ইম্ফাল ইষ্টকী শগোলমাঙদা দিষ্ট্রিক্ট হোস্পিটাল শানবা মমাঙগী কংগ্রেস সরকারগী মতম ২০১১দা যাত্রা হুল্লম্লগা লমগী চয়েৎনবা লৈ হায়দুনা কিয়ামগৈদা শানবা যাত্রা হুনখিবগী ৱাথোক অসি হান্নদি শগোলমাঙ খক্তগী ওইরম্বদু হৌজিক্তি খুন্দ্রাকপম অমসুং মসিগী অকোয়বদা লৈরিবা কেন্দ্র অয়াম্বগী মীওই কয়াসু শরুক য়াশিল্লক্তুনা অচৌবা ইশু অমা ওইরক্লে৷ লৈরিবা ৱাথোক অসিদা সরকারনা ঙম্মী হায়দুনা হেক্তমক কিয়ামগৈদা নম্ফুদা শানবা হোৎনবা নত্রগা ৱাথোক অসিনা মরম ওইরগা কেন্দ্র অনীমক্তদা হোস্পিটাল অসি শুকশা শাবা তৌদনা নমশিল্লগা থম্নবা হোৎনবসু অচুম্বা খোঙথাংদি নত্তে৷ মায়কৈ খুদিংমক্কী ৱা তারগা অচুম্বা মায়কৈ অমদা লেপ্লগা থবক তৌফম থোকই৷


লৈরিবা জিওগ্রাফিকেল পোজিসনগী মতুং ইন্না খুন্দ্রাকপম কেন্দ্রগী শগোলমাঙদা দিষ্ট্রিক্ট হোস্পিটাল অমা শাবা হায়বসিমদি য়াম্না চুম্বা খোঙথাং অমনি৷ অদুবু মমাঙগী কংগ্রেস সরকারগী মতমদা যাত্রা হুল্লবা মতুং শাংলবা চহী কয়া শাদনা লৈরম্লিবা অসিগী মনুংদা মরম অমদি শোয়দনা লৈগনি৷ শেল লৈতনা হোস্পিটাল শাগনি হায়না যাত্রা হুনবা য়াবা নত্তে৷ করিগুম্বা শেল লৈতনা মীয়ামদা নমথাক তৌরগা যাত্রা হুনবা ওইরম্লগনা মদুগী পারা অমসু মীয়াম্না মরী লৈনরিবা পোলিটিকেল পার্টিশিং অদুদা তম্বীবা তাবনি৷ ঙাইহাক্কী ভোট ফংনবা মীয়ামবু অপঙবা শীদুনা নমথাক তৌবা হায়বসিদগী হেন্না চাওবা ক্রাইম অমা লৈতে৷ মদু মীওই অমা খক্তদা নত্তে৷ কেন্দ্র অসিগী অকোয়বদা লৈরিবা মীয়াম পুম্নমক্তা তৌবা অচৌবা নমথাক অমনি৷ মসিসু মীয়াম্না নৈনফম থোকই৷ ২০১১দা হোস্পিটাল অদু শাগনি হায়না যাত্রা হুল্লম্লগা সরকার কায়খিবসু নত্তে৷ মদুগী মতুং ২০১৭গী মার্চ ফাওবা কংগ্রেস সরকার মপুং ফাবা মেজোরিতি ফংদুনা হাইনা হুম্না লৈরমখিবনি৷

মতমগী মতুং ইন্না কংগ্রেস সরকারগী মতম লোইদুনা বিজেপিনা লুচিংবা কোলিসন গভর্নমেন্ট লাকখ্রে৷ সরকার অসি হেক লাকপদগী শগোলমাঙদা দিষ্ট্রিক্ট হোস্পিটাল শানবা যাত্রা হুল্লম্লিবা মফম অসি লমগী চয়েৎনবা লৈ হায়দুনা কিয়ামগৈদা শানবা যাত্রা হুনখ্রে৷মসিনা কিয়ামগৈ মীয়ামদসু মথি ফোঙলুরবনিনা মরম অমা নত্রগা অমদা ৱাথোক লান্থোক থোক্নবগী অচৌবা মরম অমদি ওইহল্লে৷

লমগী চয়েৎনবা নত্রগা রাজনিতিগী খুদোংচাবা লৌনবা হোৎনবগী ৱাফম অদুনা নাকল নাম্মাদা থমখ্রগা খুন্দ্রাকপম কেন্দ্রগী শগোলমাঙদা দিষ্ট্রিক্ট হোস্পিটাল অমা শাবা হায়বসিদি জিওগ্রাফিকেল পোজিসনদা য়েংলুরগা য়াম্না মফম চাবা অমসুং মরম চাবা অমনি৷ শগোলমাঙ অসি ইম্ফালদগীসু লাপ্না লৈবগী মথক্তা সাইখুল, লম্লাই অমসুং উখ্রুল দিষ্ট্রিক্টকী শরুক খরগী ওইনদি অরুবা অনাবা কয়া নত্রগা ইমর্জেন্সি ওইবা অনাবশিং ইম্ফাল তম্না পুরক্নবা হোৎনবদা লম্বীদা লাইবক থীবা থৌদোক থোক্লোই হায়নিংঙাই লৈতে৷ মসিসু সরকারনা খঙফম থোকই৷ অদুবু মীয়ামগী ওইবা ইশু অসিদা রাজনিতিগী খুদোংচাবা লৌনবা হোৎনবা কাঙবুশিংসু মরুম ময়াদা য়াওশিল্লগা শিংচেপ থানবা হোৎনবা কয়াসু য়াওদবদি নত্তে৷ মদুনা মীয়াম্না চুম্না চঙশিল্লিবা ঈহৌ অসিদা মরিং মরাংবা ওইনা উবসু য়াওরি৷

কিয়ামগৈ অমসুং শগোলমাঙ অনীগী ওইনা য়েংনবদা কিয়ামগৈগী ওইনদি জেনিমস অমসুং রিমস হোস্পিটাল য়ৌরকপদা য়াম্না নকপা মসিগী মথক্তা শিংজমৈদসু অচৌবা কম্মু্যূনিতি হেলঠ সেন্টর অমা লৈরি৷অদুবু শগোলমাঙ, লম্লাই, সাইখুল অমদি উখ্রুল দিষ্ট্রিক্টকী মনুং চল্লিবা জগা খরগী ওইনদি মরক্তা জেনিমস নত্তনা ইনফ্রাষ্ট্রকচর শুনা লৈবা হোস্পিটাল অমত্তা লৈতে৷মসিমক্না কিয়ামগৈদা হোস্পিটাল শাগুমসি হায়বদি নত্তে৷ অনা-লায়েংশঙ হায়বসিদি মীওইবগী পুন্সি হিংবা অমসুং শিবা অনীগী মরক্তা মরী লৈনবনা মফম চাবা জগাশিংদা লোইনা থম্বা হায়বসিদি তঙাইফদে৷ অদুবু হৌজিক লৈরিবা ফিভম অসিদদি শগোলমাঙদনা হেন্না প্রাইওরিতি পীফম থোকই৷ অদুবু মসিদা লমগী চয়েৎনবা অমা লৈরে হায়রবনিনা হেক্তা ইরাই লাইনা তৌবা য়াবদি নত্তে৷ মতম শাংনা লৈহৌগদবা হোস্পিটাল অমা ওইবনা চয়েৎনবা য়াওদনা শানবা হোৎনবা চুম্মী৷ ফিভম অসিদা হেলঠ মিনিষ্টরনা লমগী চয়েৎনবা লৈরি হায়না চে-চাংশিং পুথোক্লগা ঙাংলি ৷ অদুগা নাকল অমরোমদনা খুন্দ্রাকপম কেন্দ্রগী এমএলএনা অতোপ্পা চে-চাং অমা পুথোক্লগা ঙাংলি৷ মসিদা কনানা লাল্লিবা নত্রগা চুম্লিবা হায়বদুদি কনামত্তা খঙদে৷ মরী লৈনরিবা দিপার্টমেন্টনা নত্রগা এসঅাইটি শেমদুনা ইনভেষ্টিগেসন চত্থরগা মদুগী ৱারোইশিন অমা পুথোকপা হায়বসিনা হেন্না অচুম্বা ওইগনি৷ মরক অসিদা চিফ মিনিষ্টরনা চয়েৎনরিবা অসিগী চপ চাবা অমা খঙদোক্নবা লমগী ৱাথোক অসি ভিজিলেন্স এন্দ এন্তি করপ্সন দিপার্টমেন্টতা শীন্নরগা থিগৎহনগনি হায়বসিমদি য়াম্না চুম্বা খোঙথাংনি৷ অদুবু থিগৎলিবনি হায়দুনা মতম লৌনবা থবক্তি তৌহন্নিংদে৷ চে-চাংদা বেজ তৌগদবনা শাংলবদা চয়োল অমা অনীগী মনুংদা লোইশিন্দুনা মদুগী ফাইন্দিং পুথোক্নবা হোৎনগদবনি৷ মসিদা মীয়াম্নসু মপুং ফানা সপ্পোর্ট তৌফম থোকই৷

করিগুম্বা ফাইন্দিং অদুদা লমগী চয়েৎনবা লৈরে হায়দুনা হোস্পিটাল শাবা তোক্লসি হায়বদুসু য়াফম থোক্তে৷ লৈরিবা ইশু অসি লমনা মরম ওইরগা ৱাথোক ওইজরবসু হেন্না মরু ওইরিবদি মায়কৈ অদুগী মীয়াম অমদি অকোয়বদা লৈরিবা কেন্দ্রশিংগী অনা লায়েংশঙ অমা মনাক নক্না থম্বীয়ু হায়বসিনি৷ ফাইন্দিং অদুদা লমগী চয়েৎনবা লৈরমদ্রগনা সরকারনা মীয়ামদা লাল্লে হায়না শেংদোকপগা লোয়ননা মদুদা ৱাথোক ওইহন্নবা ঈথিল পীরিবা কাঙবু অদু মীয়াম খঙনা চৈরাক পীগদবনি৷ অদুবু করিগুম্বা লমগী চয়েৎনবা লৈরম্লগনা নহানমখৈ মীয়ামদা নমথাক তৌরিবা মীওই নত্রগা কাঙলুপ অদু মীয়ামনা চৈরাক পীফম থোকই৷ ফিভম অদু লৈরম্বা তারগনা সরকারদা করি করম্বা মওংদা সোলুসন অমা পুরক্তুনা হোস্পিটাল অদু শানবা হোৎনবদা মীয়ামনা করি করম্বা থৌদাং লৌগদৌরিবনো হায়বদু নিংথিনা তান্নরগা থবক ওইনা পাঙথোক্নবা হোৎনবগা লোয়ননা সরকারনসু মীয়ামগী ঈহুল খঙনা অমসুং লৈরিবা জিওগ্রাফিকেল পোজিসন অদু য়েংলগা শগোলমাঙদা দিষ্ট্রিক্ট হোস্পিটাল শানবা মেকানিজম অমা পুথোক্তুনা মসিগী ৱারোইশিন অমা অথুবদা পুরক্নবা হোৎনফম থোকই৷

Ads