May 25, 2018/ Todays e-paper

ত্রাউ এফ সি না লাংসনিংবু গোল ৩-১ দা মায়থিবা পীরগা গ্রুপ-সি গী পোইন্ট টেবলগী মকোক ওইখ্রে


13th May 2018

থৌদাং পাউমীদগী

ইম্ফাল, মে১৩ঃ ওল ইন্দিয়া ফুটবোল ফেদরেসন্না (এঅাইএফএফ) শিন্দুনা টিম ১৮ না হোম এন্দ এৱ বেসিসতা চত্থরকখিবা সেকেন্দ দিভিজন অাই লিগ ২০১৭-১৮ ঙসি মণিপুরগী ত্রাউ এফ সি গী অরোইবা হোম মেটচ ওইনা খুমন লম্পাক মেইন ষ্টদিয়মদা শান্নখিবা শিল্লোংগী লাংসনিং এফ সি বু গোল্ড ৩-১ দা মায়থিবা পীরগা গ্রুপ-সি গী ওইনা পোইন্ট টেবলগী মকোক ওইদুনা প্রিলিমিনরি রাউন্দ লান্থোক্নবা ফাইনেল রাউন্দ চংখ্রে৷

ত্রাউ এফ সি অমদি লাংসনিং এফ সি না শান্নখিবা মেটচ অদুদা ত্রাউ এফ সি না মেটচ অদু মায় পাক্নবগীদমক য়াম্না কন্না শান্নখি৷ ত্রাউ এফ সি গী মায় পাকপগী গোল ৩ অদু জর্সি নম্বর ৩২ ঙাংবম নাওচানা ৩৪শুবা অমদি ৪৯শুবা মিনিটতা গোল ২, জর্সি নম্বর ৯ রাইশাংমৈ ভাসুমনা ৫৯শুবা মিনিটতা চনখিবনি৷ লাংসনিং এফ সি গী অমত্তা ঙাইরবা গোল অদুনা জর্সি নম্বর কিথোকলাং পালেনা মেটচকী ৯০শুবা মিনিটতা চনখিবনি৷

ঙসি ত্রাউ এফ সি অমদি লাংসনিং এফ সি না শান্নখিবা মেটচ অদুদা য়েংনবগীদমক ভাবকশিংনা নিংথিনা ফমথরগা মেটচ অদু য়েংননবা থৌরাং কয়া তৌখি৷ টিম অনিমক্না শান্নরিবা খুৎশান্না অদুগীদমক মায়কৈ অনিগী ভাবকশিংনা মখোয় মখোয়না শান্নরিবা খুৎশান্নশিং অদুগীদমক অপেনবা পোক্তুনা খুবাক অমদি অহৌবা খোঞ্জেল কয়া লাউনখি৷

শান্নখিবা মেটচ অদুগী ৯০শুবা মিনিটতা লাংসনিং এফ সি জর্সি নম্বর ১৭ কিথোকলাং পালেনা গোল অমা হন্দোক্তুনা ত্রাউ এফ সি গী মখুৎতা গোল ১-৩ দা মায়থিখিবনি৷ লাংসনিং এফ সি না এৱগী মেটচতা মায়থিখিবা অদুগীদমক ত্রাউ এফ সি গী মায়োক্তা মায়থিবা পীননবা য়াম্না কন্না হোৎনদুনা শান্নখি৷

ত্রাউ এফ সি না হৌজিক ফাওবদা মেটচ ১০ দগী পোইন্ট ২৩ ফংলগা গ্রুপ-সি গী ওইনা খ্বাইগী মকোক্তা লৈদুনা ফাইনেল রাউন্দ চংবা ঙমখিবনি৷ লাংসনিং এফ সি না মেটচ ১০ দগী পোইন্ট ১৫ ফংখি৷

ঙসি শান্নখিবা মেটচ অদুদা ত্রাউ এফ সি গী টিমদা মশক্নাইরবা অরিবা কয়া মিং ওইনা পল্লবদা দব্লিউ তোম্বা মীয়াম্না গোল্ডন তোম্বা হায়না খঙনবা রৈশাংমৈ ভাসুম, মৈনোনচিংবা শান্নরোই কয়া ত্রাউ এফ সি গী টিমদা শান্নখি৷

লাংসনিং এফ সি গী জর্সি নম্বর ৩ বর্লিংটোন ঙারলাফিদা রেফরিনা ৬১ অমদি ৮৩শুবা মিনিটতা য়েল্লো কার্দ অনি পীরবা মতুংদা রেদ কার্দ পীদুনা মেটচ অদুদগী তান্থোকখি৷ টিম অসিমক্কী জর্সি নম্বর ২ রোনেচেল খাংজোজমদসু রেফরিনা মেটচকী ৭৩শুবা মিনিটতা য়েল্লো কার্দ অম পীখি৷

চত্থরিবা সেকেন্দ দিভিজন অাই লিগ অসিগী ওইনা ফাইনেল রাউন্দদা ত্রাউ এফ সি গ্রুপ-এ, গ্রুপ-বি অমদি সেকেন্দ বেষ্ট টিম তাবা অদুগা ফাইনেল রাউন্দগীদমক থেংনগনি৷

Ads