May 25, 2018/ Todays e-paper

কোইরেঙ্গৈ থৌদোক প্রিপাক্না ক্লেম তৌরক্লি


10th May 2018

থৌদাং পাউমীদগী

ইম্ফাল মে ১০ : ঙরাং নুমিৎ য়ুংবা পুং ১.৪০রোম তাবদা কোইরেঙ্গৈদা লৈবা ৪৯ শুবা বি এস এফ কেম্প ময়াদা বোম পোকখায়হন্দুনা বট্টালিয়ন অসিগী বি এস এফ পার্সোনেল অনি হাৎখিবা থৌদোক অদু প্রিপাক্কী লান্মী শঙলুপ রেদ অার্মিনা চত্থখিবনি হায়না অাইন্না থিংখ্রবা লুপ অসিগী সেক্রেটরি ইন চার্জ, পব্লিসিটি এন্দ প্রোপেগন্দা লৈবাকঙাকপা লুৱাংনা থাদোরকপা চেরোল অমনা হায়রি৷

চেরোল অসিনা মখা তানা হায়রিবনা, থৌদোক অসি চহী লিশিং অনি হেনবগী পুৱারি লৈজদুনা মনিং তম্না মরোমদোম লৈঙাকচরম্বা লৈবাক অমা ওইরম্বদগী লোইলম শন্দোকপা, লম কারম্বা ইন্দিয়ানা নমদুনা লৌশিনখিবা কংলৈপাক্কী মাংখিবা নীংতম্বা অমুক হঞ্জিনহন্দুনা নীংতম্বা চাওখৎপা, মান্নবা খুন্নাই অমা লৈবাক মীয়ামদা পীনবগীদমক ইন্দিয়ান ফোর্সকী মথক্তা চত্থবা লান্দাগী শরুক অমনি৷ হায়রিবা লান্দা অসি প্রিপাক্না পাম্লিবা ইন্দিয়াগী খুভামনুংদগী কংলৈপাক্কী নীংতম্বা অমুক হন্না মুন্দুনা লমদমসিদা নীংতম্বা চাওখৎপা মান্নবা খুন্নাই অমা ফংদ্রিবা ফাওবা মফম মতম লৈতনা অফংবা তানজা অমদা হেক্তমক ইন্দিয়ান ফোর্সকী মথক্তা লান্দবগী শরুক অমনি৷ লান্দাবগী থবক মখা তানা চত্থখিগনি৷ মরম অদুনা ভারত লৈঙাক্কী মীতোপ ইন্দিয়ান ফোর্সশিং মীশি মীনা, অশোক অপন নংনিংদ্রবদি লমদম অসি থাদোক্তুনা খুদক্তা নরমদা হনখিবনা পুম্নমক্কী য়াইফবা ওইগনি৷ হায়রিবা লান্দা অসি পাঙথোকপতা হিংনবগী লান্থেংনরিবা মীচম অহুমদা অশোক অপন নংখিবা অদুগীদমক প্রিপাক্না থম্মোয় শোক্না নুংঙাইতবা ফোঙদোকচরি৷ লোয়ননা ইমুং মনুংনা নংলিবা অৱাবদা শরুক য়ারি৷ অথুবা মতমদা অশোকপশিংগী ফিভম ফগৎলকপা ওইরসনু হায়না প্রিপাক্না থম্মোয় শেংনা শেম্বীবা মপুদা থৌনিজরি৷ অসিগুম্বা থোকহন্নিংদবা থৌদোক অসি থোক্তনবগীদমক ইন্দিয়াগী লান্মী, ইন্দিয়ান ফোর্সশিংনা লৈরিবা কেম্পশিং অমসুং মনাক নকপা মফমশিংদা ইরৈচাশিংনা লৈবীদনবা লোয়ননা নকশিনবীদনবা অমুক্কা হন্না নীংশিংলি হায়রি৷

অরোইবদা চেরোল অসিনা হায়রিবনা, সেক্যুরিটিনা খুরক হাংদনা লৈরিবা ইন্দিয়ান ফোর্সকী কেম্প ময়াদা লান্দাদুনা বি এস এফকী পার্সোনেলশিংদা অশি অনা নংহনখিবা থৌদোক অসিদা শরুক য়াখিবা থৌনা ফরবা রেদ অার্মিশিংগী মতিক মথৌনা অদুগীদমক প্রিপাক্না চাওথোকচৈ অমসুং মখোয়গী চোকথবা লৈতবা খাংবা কনবগী থৌনা লিংজেল অদুমক থাগৎপা ফোঙদোক্লি হায়রি৷

Ads