May 25, 2018/ Todays e-paper

মণিপুরগী লৈহাওদা ইহান হান্না মণিপুর ফাইট লিগ পাংথোকপা হৌখ্রে


15th May 2018

থৌদাং পাউমীদগী

ইম্ফাল, মে ১৫ঃ মণিপুরগী লৈহাওদা ইহান হান্না য়োৎকী ফেঞ্চিংনা ইকোই কোয়না খাজিনবা মফমদা ঙসিদগী হৌরগা নুমিৎ নিনি চুপ্না ইম্ফালগী পেলেস কম্পাউন্দদা লৈবা ইবোয়াইমা শুমাং লীলা শঙলেনদা মণিপুরগী তোঙান তোঙানবা মফমদগী লাকপা নুপা ফাইটর ২৮ অমদি নুপী ফাইটর ১০ না পুন্না ফাইটর ৩৮ না শরুক য়াদুনা অহানবা মণিপুর ফাইট লিগ ২০১৮ মায় পাক্না পাংথোকপা হৌখ্রে৷

কংলৈপাক মিক্স মার্সিয়েল অার্টস (কেএমএমএ) না শিন্দুনা পাংথোক্লিবা মণিপুর ফাইট লিগ ২০১৮ হৌদোকপগী থৌরমদা য়াইস্কুল এ সি গী এম এল এ লোয়ননা কংলৈপাক মিক্স মার্সিয়েল অার্টস (কেএমএমএ) গীসু প্রসিদেন্ট ওইরিবা টিঐচ সৈত্যব্রতানা চিফ গেষ্ট, সোসিয়েল ৱার্কর এন সন্তোশ মঙাংনা গেষ্ট ওফ ওনর অমদি এদভোকেট কে ঐচ গোজেন্দ্রোনা প্রসিদেন্ট ওইনা শরুক য়াখি৷

কংলৈপাক মিক্স মার্সিয়েল অার্টসগী কনভেনর ওইরিবা নান্দৈবম ফ্রেঙ্কনা ফোংদোকখিবদা মার্সিয়েল অার্টসকী মশান্না হায়বসি মীওইবনা হৈজিনবদা য়াম্না কান্নবা মশান্না অমনি৷ মণিপুরগী ফাইটর লিগ অসি ৱইট কেটাগোরি খায়দোক্তুনা শরুক য়ারি৷ মণিপুরগী ফাইট লিগ অসি ইহান হান্না মণিপুরদা পাংথোকপগী মরমদি মণিপুরগী ফাইটর অফাও অফাওবা টেলেন্ট লৈরবা শান্নরোই মশিং খঙদনা মপান লমদা শান্নরি৷ মখোয়বু মণিপুরগী মায়কৈদগী মতেং ফংদবদগী মপান লমদা হৌজিক হৌজিক শান্নদুনা লৈরি৷

মহাক্না মখা তানা হায়, টেলেন্ট লৈরবা মণিপুরগী ফাইটরশিং অসিগীদমক কাংলৈবাক মিক্স মার্সিয়েল অার্টসনা ফাইটর লিগ অসি মখোয়গীদমক ঐখোয় লৈরি হায়না পাংথোকপনি৷ মণিপুরগী প্রজা মীয়াম্না নুংশিবীদুনা মতেং পাংবিরগদি নোংমদি শুংশোই শোইদনা মণিপুরগী ফাইটরশিংনা মালেমগী থাক্তা য়ৌবা ঙমগনি হায়না থাজবা থমখিবগা লোয়ননা চৎলিবা চহি অসিগী ওক্তোবর থা অসিদা ইন্টরনেসনেল ফাইট নাইট অমা পাংথোক্নবা শেম শারি৷ মসিদা ফোরেইন ফাইটর, ইন্দিয়াগী টোপ ফাইটরশিং কৌদুনা মণিপুরগী টোপ লেভেল ফাইটরশিংগা থেংঙ্গাইননবগী পান্দমসু থম্লী হায়না ফোংদোকখি৷

ঙসি অহৌবা নুমিৎতা পাংথোকখিবদা কেজি ৬১ মখাগী কাংলুপকী মেন্সকী অহানবা বাউটতা য়াইমা লাইশ্রমনা টাইটল বেল্ট ৱন্নর ওইখি৷ কেজি ৫৬ মখাগী কাংলুপকী নুপাগীদা এসঐচ জিমস, কেজি ৬০ মখাগী নুপাগীদা মোরাম্বা এস ঐচ, কেজি ৮০ মখাগীদা জোধাজিৎনা টাইটল বেল্ট ৱন্নর ওইখি৷

নুপীগী কেজি ৫১ মখাগী কেটাগোরিদা হোমেশ্বরি, কেজি ৬০ মখাগীদা মোনিকা অমদি কেজি ৫১ মখাগীদা সুমাতিনা টাইটল বেল্টগী ৱন্নর ওইখি৷

Ads