May 25, 2018/ Todays e-paper

ইমাগী নুংশিবা


15th May 2018

Usham Dharmendra -

      ইমা হায়বসিগী নুংশিবদি মমল নাইদে৷ ঐবু থাবুম তরা নাউপুদুনা তাইবঙপানসিদা মীৎকপ থোকহনবীদুনা তাইবঙপানসিগী মহৌশাগী ফজবা কয়া উহল্লিবা অসি ইমাগী থৌজালননি৷ বম্মর্ামক্না ফংঙমদ্রবা মীওই মপোক্নি হায়নরিবনি৷ অসিগুম্লবা তাঙলবা মীওই মপোক অসিগী পলেম ইমানা ফংহনবীবনি৷ অদুগুম্বী অপোকপী ইমাবু নীংশিংজবগী মহাকপু ইকাই খুম্নবা উৎপগীদমক্তা মালেমগী মফমশিংদা ‘ মাদর্স দে’ ইমাগী নুমিৎ হায়না পাঙথোক্নৈ, মে থাগী অনীশুবা নোংমাইজিং নুমিৎতা৷


‘মাদর্স দে অহানবা ওইনা ইং শক ১৯০৭ তা ফিলাদেল ফিয়াদা লৈবী এননা এম জারভিসনা পাঙথোকখি৷ মদু মহাক্কী অপোকপী মমাবু নীংশিংদুনা মহাক্কী মমানা অামেরিকান সিভিল ৱারদা অশোক অপন নংলবা লান্মীশিংদা তৌরমখিবা সেবা মহাক্কঞ্ঝী থৌদাংশিং অদুবু নীংশিংদুনা পাঙথোকপা হৌখিবনি৷ ইমাগী নুমিৎ অসি পাঙথোক্তুনা মমা ওইবীশিংবু মচা ওইবশিংনা ইকাই খুম্নবা উৎনরি৷

নুমিৎ অসি ইরমদমসিদসু হরাও তয়াম্বগা লোয়ননা লন্নাই লুপশিংনা পাঙথোক্তুনা অচম্বা খুদোলপোৎশিং মমা ওইবীশিংদা পীনরি৷ মসি নত্তবা লন্নাই মীওই ইমুং মনুংগী ওইনা মচা ওইবীশিংনা মমা ওইবীশিংদা অচম্বা মমানা পামজবা খুদোলপোৎ পীদুনা পাঙথোক্নবসু চৎনরক্লে৷ মমাঙঙৈদা অসুম্না পাঙথোক্নরমদ্রবসু হৌজিক্তি তপ্না তপ্না ইরমদমসিদা পাঙথোক্নরক্লে৷ মতমনা পুরকপা অফবা খুদোলনি৷ ইমাগী নুমিৎ ‘ মাদর্স দে’গী থৌরমবু পাঙথোক্লবসু পাঙথোত্ক্রবসু মমা মচা অনীগী মরীদি থাদোক্নবা য়াদ্রবা মরীনি৷ তাইবঙপানবসিদা খ্বাইদগী ফজবা শক্তম অমা হায়বা তারবদি মমানা মচাবু পম্বগী শক্তমনা ওইগনি৷ মমানা মচা পম্বগী শক্তম ফজবা ৱাহৈনা শিংথাবা ঙম্লোই৷

তাইবঙ মীওইবনা ভাব তারকপদা ফিজি পায়দুনা ইন্নরিবসি পলেম ইমাগী ফিজিদনি, ইমানা ৱাবা উরগা মচা ওইবীশিংনসু ৱাজরিবনি৷ ইমানা নুংঙাইবা উরগা মচা ওইবীশিংনসু নুংঙাইজরিবনি৷ মৈতৈ অশৈবনা শৈথাজরম্মী, ‘ হো ইমা ইমা-ও ঐসু লাক্কে ইমা -ও, নোং চুইদা লাক্কনু, য়েম্পাক তুপ্তুনা মলাক্কে, লম্বী নাল্লি লাক্কনু চৈশু শুদুনা মলাক্কে৷ নচানা হয়েং চাউরগা চাউর-শারেপ ফারগা সঞ্জেন্থোংগী থোঙয়াইদা শামু তোঙদুনা লাকপদা ইমা নঙবু কাউজরোই৷ নুংশিরবা মমা মচা অনীগী নুংশি মরীদু উৎপনি৷ হয়েং নচানা মীথোই মীহেনবা ওইরগা মমাবু কাউজরোই হায়বনি৷

ঙসিগী খুন্নাই অসিদা মমা ওইবীশিংবু মচা ওইবশিংনা নীংথি নুংঙাইনা লোইনবীরিবরা? হায়বসিসু নৈনবা য়াবা ৱাফম অমা ওইরক্লি৷ পীক্লিঙৈগী মতমদা মমানা হায়বতা ইল্লম্বা মচা ওইবা কয়া নুপী থিরবা মতমদা মমাবু নীংথি নুংঙাইনা তৌবীদবা নুপীগী খুদোম্বীদা লৈবা মচা ওইবা কয়াসু ঐখোয়গী খুন্নাইসিদা লৈরি৷ মদুগুম্বা মমা মপানা ৱানা শেমজরকপা মচাদুনা মমা মপাদু নীংথিনা লোইনবীদবা অমদি মহাকসু নোংমদি অহল ওইরক্কনি হায়বা কাউনা পাল্লি৷ ঙসি মহাক্না লুনা তৌজরিবা মচাশিংদুনা হয়েং মহাক্না অহল ওইরক্লবা মতমদা ঙসি মহাক্না মহাক্কী মমা মপাদা উৎলিবা মীনুংশি অদুগুম্বা মঙোন্দসু উৎলক্লোই হায়নিংঙাই লৈতে৷ থমজনিংলিবা ৱাফমদি মচা ওইবশিংনা অহল ওইশিল্লক্লবা মমা মপা ওইবশিংবু লুনা চান্না তৌবীবা য়েংশিনবীবা মথৌ তাই হায়বসিনি৷ অমুকসু ঙসি কেনা মৌনা লৈরিবী মৌ নহাদুনা খঙগদবদি মহাক্কী অহল ওইরবী মনেমপোক্তুসু মহাক্কুম্না শাগৈ অদুদা বজাই বেঙ্গুন খোংদুনা তনৌরবী মায়থোংদা নীংথিনা ফিজেৎ লৈতেংদুনা য়ুমগী মৌ অমা ওইনা নোংমা লাকখিবনি হায়বসিনি৷ ঙসি অহল মতম ওইদুনা কম্লাক কুরু কাদুনা শোন্না লৈরিবী মহাক্কী মনেমবোক্কুম মহাকসু মতম অমদা অহলগী মতম ওইরকখিগনি হায়বসি কাউদবা ফৈ৷

মীওইবগী পুন্সি খোঙচৎ অসি খঙহৌবা নত্তে, চহী অমা হায়বসি হৌখিবা করিসু খঙহৌদে৷ খরা ইং , খরা শা, নোং খরা চু অদুমক হৌখি৷ চহী অমদগী অনী অনীদগী অহুম, অহুমদগী মরী৷ অসুম্না চহী কুনগসি করিসু খঙহৌদে৷ মীওইবা অমগী পুন্সিদা চহী কুন কয়ানো হায়গদৌরিবসিবো খল্লুবদা নুংশি৷ পুন্সি খোঙচৎসি তুম্লুবগা চপ মান্নৈ৷ মমাঙঙৈদা থেংনখিবা খঙন-চান্নবা কয়া খ্বাইরম্বন্দ কৈথেলদা করিদা থেংনবদা লোইনা অহল ওইশিল্লম্মী৷

নৌনা মমা কায়নরবা নত্রগা তাইবঙ মীৎকপ তারকঙৈদগী অপোকপী মমাগী মশক খঙজদ্রবা মচা ওইবা কয়ানা ইমাগী নুমিৎ, মাদর্স দেনা লাকপদা থোইনা হেন্না মমাবু উনিংবগী মমা মশক খঙহৌদ্রবশিংদুনা মমাগী শক্তম লাকশিনজরমগনি৷ ঐখোয়না ঐ ঐগী অপোকপী ইমাবু ইমাদনি খনবগী মথক্তা ইমাগুম্বী কয়াবু ইমানি খনবগী পুকচেল অদু চেল্লবদি খুন্নাইসিদা তাহৈ-উহৈদবা থৌদোক ময়াম থোক্লিবসি থোক্লম্লোই হায়জনিংই৷ হিংনবগী লানফমদা ইমা কয়া অৱা কোঙ্গাই মায়োক্নরি৷ ঙম্লবা চীংগী লোক্নুংদা কোক্তা শম্বু পুদুনা ৱাগী উতোংদা ঈশিং শোকপা কুম্লি৷ নোংলৈ নুংশিৎ নাচুংদনা পাৎকী ঈয়াই ঈপাক্তা ইমা কয়া লেম্লৈ ঙা ফারি৷ পুম্নমকসিগী মথক্তা অফং-অফংবা মনা মশিং ঙা তিক্লুদুনা খ্বাইরম্বন্দ কৈথেল কারক্লি৷ লৈঙাক্না শাবীবা নিংথিনা নুংঙাইবা পোৎফম শঙদা ফম্বসু ফংজদে , লম্বীগী চীদাইদা প্লাষ্টিক মচেৎ অমা থারগা নোংজু নুংশা নাচুংদনা মনা মশিং ঙানচিংবা য়োল্লি৷ লৈঙাক্কী পুলিসনা মফম চাদে হোংদোকউ হায়বদগী হেন্দোক্তুনা মনা মশিং পোৎলমশিং অদুবু চাইখায়বীরি৷ ইমা মানবীদুসু নুংঙাইবা পোৎফমদা ফম্নিংলমগনি৷ অদুবু নুংঙাইবা পোৎফমদি ফম্বা ফংদে৷ থিজিল্লুরবদি অচৌ অশাং শেল পায়বগী মমা মরী মতা ঙাক্তা ওইরমগনি, নুংঙাইবা পোৎফম শঙদা ফম্লিবীশিং৷ অমুকসু কনাগুম্বশিংনা মমাগুম্বীশিংদুনা য়োঞ্জরিবা মনা মশিং পোৎলম খরদু শোল্লিবা মমলদুদগী য়াম্না তারগা লৌনবা হোৎনৈ৷ অঙকপনি লুপা মঙা তরাগীদমক্তা পুঙ্খায় অমা চুপ্না মন্তিক্নবা ঙম্মী৷ অদুগুম্বা মীওই অদুনা য়ু থকফম ভেন্দরদদি শেল পীরমদাইদা ঐ পীগে , ঐ পীগে হায়দুনা লুপা ৫০০ চৎপীদু পুথোক্তুনা পীবা হানবা তান্নৈ৷ ঙসিগী খুন্নাইসিদা মমা ওইবশিংনা মচাশিংদগী পাম্লিবসি অতৈ নত্তে৷ মচা ওইবশিংনা হুগী মশক ওইরবা নিষাশিংদগী লাপ্না লৈবা অদুনি৷ ঙসি ঐখোয়গী খুন্নাই নিষাগী ঈপাক্তা ঈরাক্নরে৷ নহা ওইরিবা কয়া য়ুদা লাইচুবা অয়ুক ঙন্তা চা থকপগী মহুৎতা য়ু থকপা, মদুদগী য়ুমায় পানবা কয়া উরে৷ অমুকসু নম্বর ফোর কাপ্পা কয়া অমা শৌ শানা লৈরে৷ উকু মথক্তা, খোংনাং মখোঙদা পুল্লপ পুল্লপ মঙদুনা লৈবা লম কয়া লৈরে৷ পুম্নমকসিনা ঐখোয়গী তুংগী লাইবক করি ওইগনি৷ মচা ওইবশিংনা নিষাগী ঈপাক্তা তাউবা উরগা ৱাজরিবসি মমা ওইবীশিংনি৷ মচাশিংবু মীথোই মীহেনবা মী ওইহন্নিংই৷ ঙসিগী মচা ওইবশিংনা মমা ওইবীশিংগীদমক্তা লৈবাক্কীদমক্তা খল্লগা নিষা শীজিন্নবগী হৈনবী থাদোকপা মতম ওইরে৷

লোইশিল্লকপদা ঐ ঐগী ইমাবু লুনা তৌবগী মথক্তা ইমা মানবী কয়াবুসু ইমামক্নি খনবগী পুকচেল অদু চেনসি ইমা ওইবী কয়ানা হিংনবগী লানফমদা চাউরবা পুন্সিগী থৌদাং য়াদুনা লাকপা লমদমনি৷ অদুগুম্বা মমা ওইবীশিংদুনা মচানা মীথোই মীহেনবা ওইরগা থম্মোয় মকা লাম্না লৈজরিবনি৷ ইমাশিংনা খুয়া তুশিৎনা পুন্সি নুংশাংনা লৈনবগীদমক্তা মচা ওইরিবশিং জ্ঞান তানা নিষাদগী লাপ্না লৈসি৷ পুন্সিসিদা ইমাশিংনা পামজবা মচা অমা হায়বদো ওইননবা হোৎনসি হায়বা ৱাফমসি অইবনা থমজরি৷

Ads