December 11, 2018/ Todays e-paper

ষ্টেটকী ফন্দ লান্না শিজিন্নবগী ৱাটর রিসোর্সেস খুগা দিভিজনগী এস:ও: অমদি কেশিয়ার অনিমক ৱার্নিং তৌনবা


18th August 2018 |

থৌদাং পাউমীদগী

ইম্ফাল অাগষ্ট ১৮: নৌনা মমিং ওনখ্রবা ৱাটর রিসোর্সেস দিপার্টমেন্টকী খুগা কেনেল দিভিজন নম্বর ৱানগী সেক্সন ওফিসার (এস:ও:) অমদি কেশিয়ার অনিমক ষ্টেটকী ফন্দ লান্না শিজিন্নবগী চার্জদা ষ্টেট ভিজিলেন্স কম্মিসন্না ৱার্নিং তৌনবা মরী লৈনবা এদমিনিষ্ট্রেটিভ দিপার্টমেন্টতা অখন্নবা রিকম্মেন্দেসন লেটর থাদুনা খঙহনখ্রে৷

দিপার্টমেন্ট অসিনা ইরিগেসন এন্দ ফ্লদ কন্ট্রোল দিপার্টমেন্ট (অাই:এফ:সি:) ওইরিঙৈ হৌখিবা চহি ২০০৭ তা দিপার্টমেন্ট অসিগী খুগা কেনেল দিভিজন পুরম্বা ইকজিক্যুটিভ ইঞ্জিন্নিয়ার (ই:ই:) সি:ঐচ: রনবীরগী মথক্তা সরকারগী ফন্দ অমদি পৱার লান্না শিজিন্নৈ হায়দুনা কম্মিসন অসিদা কমপ্লেন্ট অমা লাকপদগী কম্মিসন অসিনা কেশ (নম্বর৩৷ এস:পি-ভি৷ ২০১৭) অমা লৌখৎলগা থিগৎপা য়াবা থিগৎপদা মথক্কী ওফিসিএল ২ অসিনা ফন্দ লান্না শিজিন্নবগী লংলা-লংজিল ফংবা ঙমখিবনি ৷

অসুম্না ষ্টেটকী ফন্দ লান্না শিজিন্নবতা নত্তনা মখোইগী মথক্তা লৈবা দিভিজনেল ই:ই: গী মিংচৎ থিহনবগী দায়ত্ব ওইরিবা ওফিসিএল ২ মক ৱানির্ং তৌনবা মমাং চহিগী ওক্টেবর তাং ৯ দা এদমিনিষ্ট্রেটিভ দিপার্টমেন্টতা লেটর (নম্বর৩৷ এস:পি-ভি৷ ২০১৭৷ ৬৮৬) থাদুনা খঙহনখিবনি হায়রি৷

অতোপ্পা ভিজিলেন্সকী কেশ (নম্বর৪০৷ পি:ই:৷ এস:পি-ভি৷ ২০১৪) কা মরী লৈননা ভিজিলেন্স কম্মিসন্না ৱাঙ্গোই জোনেল এদুকেসন ওফিস (জেৎ:ই:ও:) গী মখাদা লৈবা নারন কোঞ্জিন মমাং লৈকাই অপ্পর প্রাইমারী স্কুলগী প্রাইমারী টিচর ওইনা ওইনা হেদ মিষ্ট্রেসকী চার্জ পুরিবা এন: মেমচাবু ৱানির্ং তৌনবা কম্মিসন অসিনা মমাং চহিগী ওক্টোবর ১৬ তা মরী লৈনবা এদমিনিষ্ট্রেটিভ দিপার্টমেন্টতা রিকম্মেন্দেসন লেটর (নম্বর ৪০৷ পি:ই৷ এস:পি-ভি৷ ২০১৪) থাদুনা খঙহনখ্রে৷কম্মিসন অসিগী রিপোর্ট মতুং ইন্না মথককী স্কুল অসিগীদমক সরকারনা থাদরকপা স্কুলগী দিভেলপমেন্টতা য়ুম্ফম ওইবা স্কুল গ্রান্ট, মেন্তীনেন্স গ্রান্ট, টিচিং লার্নিং মেটরিএলস (টি:এল:এম:) গ্রান্ট, য়ুনিফোর্ম গ্রান্ট, ফ্রী টক্সবুকনচিংবা স্কুলগী ফন্দশিং লান্না শিজিন্নরম্বতা নত্তনা মীদ-দে মীল কিটচন শেদকী প্রোভিজন ফাওবা লন্নাইগী কান্ননবা লম্বীদা ওন্ন-তৈনবা মওংদা শিজিন্নরম্মী হায়রি৷

অসুম্না স্কুলগী ফন্দ অমদি মীদ-দে মীল স্কীমগী প্রোভিজন ফাওবা লান্না শিজিন্নরম্লে হায়বসি ভিজিলেন্স পুলিসনা থিগৎপদা লাইনা প্রমানগা কোন্ননা খঙবা ঙমখিবগা লোয়ননা মতুং-মনাও অরানবা থবক তৌবা ঙমদনবা মথক্কী স্কুল অসিগী তংতাবা রিগুলর হেদ মাষ্টর ৷ হেদ মিষ্ট্রেস হাপ্নবা, জেৎ:ই:ও: ৱাঙ্গোইগী ওফিসনা মতম মতমগী ওইনা স্কুল অসিদা ভিজিৎ চত্তুনা ইন্সপেক্সন তৌনবা অমদি প্রাইমারী টিচর মেমচাবুনা খাংঙুথক্তা হেদ মিষ্ট্রেসকী চার্জ পুরুবা অদুনা মরম ওইরগা ৱার্নিং তৌনবা রিকমেন্দেসন লেটরদু থাখিবনি হায়রি৷

মখা তানা ভিজিলেন্স কম্মিসন্না এক্সাইজ দিপার্টমেন্টতা হৌখিবা চহি ২০০৯ দা খুৎশেমগী ওইবা এদুকেস্নেল সার্টিফিকেৎ শিজিন্নদুনা লেদী কন্সটেবল ওইনা থবক চংলম্বনি হায়বা গুরু অরিবম লতা দেবী কৌবী নুপী অমগী মথক্তা দিপার্টমেন্টেল প্রোসিদিংস চত্থনবা মমাং চহিগী ওক্টোবর ৮দা এদমিনিষ্ট্রেটিভ দিপার্টমেন্টতা চিঠি (লেটর নম্বর ১৪৷ ভি৷ সি:পি-ভি৷ ২০০৯৷ ৬৮৭) ইদুনা রিকম্মেন্দ তৌখ্রে৷ ভিজিলেন্সনা লৌখৎপা কেশকী মতুংইন্না থিগৎপদা অশাবা সার্টিফিকেৎ শিজিন্নদুনা থবক চংলম্মী হায়বগী প্রমান পুথোকপা য়ানবা দিপার্টমেন্টকী ওইবা প্রোসিদিংস চত্থনবগীদমক রিকম্মেন্দ তৌখিবনি হায়রি৷

অমরোমদা ভিজিলেন্স পুলিসকী অখন্নবা ইনক্বারীদা খাদী এন্দ ভিল্লেজ ইন্দষ্ট্রিজ বোর্দ, মণিপুরদা চিফ ইকজিক্যুটিভ ওফিসার (সি:ই:ও:) ওইনা থবক তৌরম্বা টি:ঐচ: বিরগোপালনা বোর্দ অসিগী ষ্টাফ খরগা লৌতুনরগা বেনিফিশরিশিংনা হাংলিবা একাওন্টশিংদা ইরিগুলর ওইবা মওংদা লু: লাক্ষ ১২ লিশিং ৬০ থাজিল্লম্বগী চার্জদা এফ:অাই:অার: (নম্বর ৪(০৯)২০১৭-ভি:পি:এ) লৌখৎলগা ইনক্বারী তৌবা হৌখ্রে৷

অাই:পি:সি: গী সেক্সন ৪২০৷ ৪০৩ ৷ ৪০৯ ৷ ১২০-বি ৷ ৩৪ অমদি প্র্রিভেন্সন ওফ করপ্সন এক্ট কী সেক্সন ১৩(১) (সি) গী মখাদা লৌখৎলিবা কেশ অসিগী মতাংদা হৌজিক লৈরিবা ফাইন্দিংসতি একাওন্টসতা শেল থাজিল্লিবা অপুনবা বেনিফিসরী ১৪ গী মনুংদা ৫ দি জেনাইন ওইরগা অতৈ ৯ না লন্নাই শেল তানবা য়ানবা সি:ই:ও: না মহাক্কী ষ্টাফ খরগা লৌতুনদুনা হাংবা অশাবা বেনিফিশরীগী একাওন্ট ওইরম্লে হায়রি৷

Ads