May 25, 2018/ Todays e-paper

প্রাইভেট স্কুলশিং অচৌবা শেন্দালফম ওইরক্লিবসি সরকারনা মীৎয়েং চঙফম থোকই


7th May 2018

      সরকারগী স্কুলগী ওঝাশিংগী ত্রান্সফার পোষ্টিংদা রাজনিতিগী খুৎ চঙনরকপা অমদি স্কুলশিং অসিবু য়েংশিন্নবা লৈরিবা সরকারগী ওফিসিয়েলশিংনা মথৌ তৌরক্তবা, অদুগা অমরোমদনা প্রাইভেট স্কুলশিং লিংখৎপা য়াবগী অয়াবা পংপীদা পীথোকপনা ঙসিদি সরকারগী স্কুলশিং নোংমা নোংমগী শিথরক্লি৷ মসিগী খুদোংচাবা অসি লৌদুনা প্রাইভেট স্কুল কয়া অমা ষ্টেটসিদা চেঙ্গুম শৌবগুম শৌগৎনরকপা, অদুগা অমরোমদনা প্রাইভেট স্কুলশিং অদুনা অহেনবা মহৈরোই ফংনবা হোৎনবদা বোর্দ ওফ সেকেন্দরি এদুকেসন মণিপুর না লৌবা ঐচএসএলসি একজামিনেসনগী ফল হেক লাওথোকখিবগা প্রাইভেট স্কুল চল্লাইরিবশিংনা তোপ রেঙ্কিংদা লাকখিবা মহৈরোই কয়া অমা ব্রাইভ তৌদুনা অমসুং মখল মখা কয়াগী ওফর কয়া পীশিন্দুনা মখোয় মখোয়গী স্কুলশিংদা তমহন্দুনা টুয়েল্ব পরিক্ষাদা মীংচৎ লৌনবা হোৎনবগী থৌওং অনৌবা নৎত্রে৷


মখোয়না ব্রাইভ তৌদুনা লৌখিবা মহৈরোইশিং অদুনা মশাগী ওইনা মখোঙ শেংদুনা লাকপা, অদুগা ব্রেনি ওইবশিং ওইবনা টুয়েল্ব পরিক্ষাদসু পোজিসন হোল্ডর ওইনা য়াওরকপা মশানা তাবনি৷ মদুগী খুদোংচাবা অদুদা স্কুলশিং অদুনা মহৈরোইশিং এদমিসনগী মতমদা মখোয়গী ওইনা অফবা ছাত্রা কয়া পুথোক্লিবনি হায়না এদমিসন ফি অমসুং মন্থলি ফি অঙকপা ফংনা লৌরি৷ মসিদা য়েংশিনবীনবা কনাসু লৈতবনা চহী খুদিংগী প্রাইভেট স্কুলশিংগী মিংচল শেল অমসুং থাগী ফি অসি লেপ্তনা হেঙ্গৎলক্লি৷

লমদম অসিগী ত্রেন অমা ওইনা মচা মশু য়াম্না পোক্নদবনা মখোয় মখোয়গী মচাশিং অদু অচঙবা মীওই অমমম ওইহন্নিংবনা চরা হেনবমখৈ মচা মশুশিং অফবা প্রাইভেট স্কু লশিং থীদুনা তমহন্নরি৷ তশেংনা তেন অমসুং টুয়েল্ব পরিক্ষাদা পোজিসন লেপ্লিবা প্রাইভেট স্কুলগী মহৈরোই অয়াম্বা অয়ুক নুংথিল নুমিদাং খাক্তনা ট্যুসন্না য়োম্লবা মহৈরোইশিংনা অয়াম্বনি৷ অদুগা সরকারগী স্কুলশিংদা তম্লিবা মহৈরোইশিং অসিনা শেন্থোক লম্বী ন্বাৎলবা ইমুং মনুংগী মহৈরোইশিং ওইবগী মথক্তা মমা মপা ওইরিবশিং অয়াম্বনা মখোয়গী হিংনবগী উপাই থীরিঙৈদা মচা মশুশিংদা নিংথিনা য়েংশিনবা ঙমদ্রবা কাঙবুশিং ওইনা তৌরি৷

প্রাইভেট স্কুল অমসুং গভর্নমেন্ট স্কুলগী হৌজিক লৈরিবা ত্রেন অসিদা সরকারনসু অকনবা মীৎয়েং চঙফম থোকই৷ মেত্রিক পরিক্ষাদা পোজিসন লেপ্পা মহৈরোই কয়া অমা প্রাইভেট স্কুল খরনা ব্রাইভ তৌদুনা মখোয়গী করবারগী মওংদা চত্থরিবা অসিসু অচৌবা করপ্সন অমনি৷ মসি থিংফম থোকই৷ মসিগা লোয়ননা প্রাইভেট স্কুলশিং অসি সরকারগী অয়াবা অমগী মখাদা লিংখৎপা ওইবনা এদমিসন ফি অমসুং মন্থলি ফিগী মতাংদা সরকারগী ওইনা লেপথোক্লবা রেট অমদি থম্ফম থোকই৷ মসিগা লোয়ননা সরকারগী ওইবা স্কুলশিংসু মতিক চানা ওঝা মরাং কায়না থমদুনা প্রাইভেট স্কুলগা কম্পিটিসন তৌবা য়াবা মওংদা শেমগৎফম থোকই৷ মথৌ তারবদি গভর্নমেন্ট স্কুলদা তম্লিবা মহৈরোইশিং অদু হেন্না অফবা অমা ওইনবা অখন্নবা কোচিংনচিংবা পাঙথোকপগা লোয়ননা পোজিসন হোল্ডরমক নৎত্রবসু ফার্ষ্ট দিভিজনদা লাকপা মহৈরোইশিংদা সরকারগী মায়কৈদগী পুক্নিং থৌগৎপা য়াবা থবক থৌরমশিং পায়খৎফম থোকই৷ অফবা মহৈরোইশিংদি লোইনমক প্রাইভেট স্কুল খরনা ব্রাইভ তৌদুনা অমদি মমা মপা ওইবশিংনা মচাবু অফবা মী ওইহন্নিংবদগী মমিং লৈরবা প্রাইভেট স্কুলশিংদা তমহনখিবনা গভর্নমেন্ট স্কুলনা ফনা কন্না হোৎনরবসু মখোয়গা লম্বা তৌবা য়াবা হৌনদে৷ অদুনা গভর্নমেন্ট স্কুলশিংগী ওইনদি সরকারনা অখন্নবা থৌরাং অমা পায়খৎফম থোকই৷

মসিগা লোয়ননা ওঝাশিংগী ত্রান্সফার পোষ্টিংদা রাজনিতিগী খুৎ য়াওদনবা হোৎনগদবনি৷ ওঝাশিংগী এটেন্দেন্স নিংথিনা চেক তৌবগা লোয়ননা ওঝাশিং মতমগা চান্নবা ত্রেনিং কয়া অমা পীবগা লোয়ননা মখোয়গী ওইনসু মরক মরক্তা একজামনচিংবা পাঙথোক্তুনা য়াম্না চেলেঞ্জিং ওইবা ষ্টেটস অমদা থম্নবা হোৎনগদবনি৷ য়াম্না লেমজনিংঙাই ওইরবা ওঝাগী শিনফম অসিগী সেলেক্সনদা অঙম অথৌগী খুৎ য়াওদুনা মহৈরোইশিংদা নিংথিনা তাকপীবা ঙমদবা ওঝাশিং য়াওদবা নত্তে৷ মদুগুম্বা কয়া অদু একজাম তৌদুনা খন্দোকপনা মহৈরোইশিংগীদমক্তা কত্থোকপগা লোয়ননা থবক তৌরিবা ওঝা কয়া অমা ইকাই ফিরুপ খুম্লিবা অসিদগী খরদং ওইরবা কোকহনবা ঙমগনি৷

Ads