May 25, 2018/ Todays e-paper

উমং লাই কনবা লুপ (উকল) অমদি লৈবাক মীয়ামদা


13th May 2018

লাই হরাওবা হায়বসি করম্বা মতমদগী হৌরকপনো হায়বা চপ চাবা খঙলুদ্রবসু মৈতৈগী খুন্থোকলোন্দগী মশক মতৌ তাকপা মরমচৎ ওইরি৷ লাই হরাওবা য়াম্না ঙল্লিঙৈ মতমদা মীশিং য়াম্না লিক্লিঙৈ মতমদা মীশিং হেঙ্গৎনবা তৌরম্বা কুম্হৈ অমনি হায়বদা লানগনি হায়বা থাজদে৷


লাই হরাওবদা কুইনা লিশাং শিৎনা তৌরকপদগী তৌহৈদবা কয়া য়াওরক্তবা নত্তে৷ লাইবুংদা অমাইবা অমাইবীশিংনা হেনজিনবা কয়া তৌরকপদগী য়েংনিংদবা তানিংদবা শিংদো ঙসিদি উকলনা কাংলোন কান্দনবগী অকনবা চৎনলোন থম্বদগী ফনা য়াম্না শেমদোক্লে৷ অদু ফাওবদা হন্দক য়াইরিপোক্তা তাঙ্খুল শাবগী হেঞ্জিনবা মতৌদুদা ঈরাং থোক্লকপদগী মীশি মীনা য়াওখিবদু অফবগী খুদম অমদি নত্তে৷ মতম অসিদা ঐখোয়গী মৈতৈ খুন্নাইদা খ্বাইদগী ফৎখিদ্রবা খুন্নাই অসে মনিং হন্নবা চৎনবী অমা ওইরক্লিবা নুপা অয়াম্বা য়ু থকপগী চৎনবী ওইরক্লিবা লোয়ননা তুংগী খুন্নাইদা মশক মচু শেমগদবা নহাশিংগী শরুক অয়াম্বা য়ু অমদি অতৈ নিষাগী পোৎলমশিংদা থৱায় য়াওবা হেঞ্জিল্লক্লি৷ ঐখোয়গী নুপীশিংসু অদু মঙাই নুপী অয়াম্বা ক্বা চাদবা য়াওশিল্লক্ত্রে৷ নুপাসু নুপীসু তৌদ্রবা য়াদ্রবা অমগুম চৎনরি৷ অথেংবা ফাওবা লাই হরাওবগী মিংদা লাওখোংদুনা লৈবগা য়ু অমদি কুগা নক্নবা মরী লৈনরি৷ লাই হরাওবা হায়বসিমক্তবু থৌগল তৌরিবশিংদু নত্তবীদা লাইবুংগী অকোইবদা লাংলিবশিংদি ইনখৎলক্লিবা নহাশিং অমদি নুপী অঙাংশিংনি৷

মতাং অসিদা লৈবাক মীয়াম অমদি উকলদা থমনিংলিবদি, মালেম অসে য়াম্না হোংলে, অদুসু খোঙজেল য়াম্না য়াংনা৷ পৃথিবী অসে অপীকপা খুঙ্গং অমনি হায়রম্বদগী ঙসিদি মোবাইল ফোনদা ইন্টরনেট হাপচিনবা য়ারকপদগী মালেম অসে ফুরিৎখাওদা হাপ্লগা কোইপু পুরি হায়বদা লানদ্রে হায়বা য়ারি৷ সাইন্স এন্দ টেক্নোলোজিনা চাওখৎলকপদগী মালেম অসে পোৎশক্কী ওইবা পোৎতা ঙমদবা লৈশিল্লক্ত্রে হায়বা য়ারে৷ অসিগুম্বা মালেমগী হোংলক্লিবা ঐখোয়সু মপুং ওইনা নহাশিং শোয়দনা য়াওহৌদবা য়াদবনি৷ হৌজিক্তি মহৌশাদু নৎত্রে৷ উপাই অমা থিদুনা খ্বাইদগী অহেনবা তান্নরবা মতমনি৷ ঐখোয়গী নহাশিং ঈচেল অসিদা য়াওহৌদবা তারগদি তুশোন মানশোনবা মীপাল তাঙলবা লমদম অমা শোয়দনা ওইহৌরগনি৷ কুইনা মীপাল তাঙলক্লগদি ফুরুপ অসে শুম পীকশিল্লক্তুনা মুৎখিবা য়াবগী ওইথোকপা ৱাংনা লৈ৷ ঐখোয়গী নহাশিং ৱার্ল্ড ক্লাসতা শেম্বীরগদি য়াম্না তোন্থনা হিংবা নত্তে৷ লাই হরাওরিবনি হায়দুনা অথেংবা ফাওবা অহৌবা খোঞ্জেল (মাইক) শীজিন্নদুনা অশোন অনাদা চাওনা অকায়বা পীরি৷ মহৈ তমজরিবা অঙাংশিংদনা খ্বাইদগী হেন্না অকায়বা পীরে৷ মসিমক চৎনবীনি হায়দুনসু মীয়াম্না পাম্নদ্রবা চৎনবী অমদি ওইরবনি৷ মথৌ তাদবদা চৎনবীদুনা হেন্না ৱাংনা চৎখ্রগদি লৈবাক্কী শেল থুমগী থৌশিলদা মনিং হল্লকপা তাবনি৷ শেল থুম মনিং হল্লকপা হায়বসে হিরম খুদিংমক্তা অফবা অমদি ওইদে৷

ইনিংবদি য়াম্না লৈখ্রে৷ অদুবু মরু ওইবা পোইন্ট অমা অনীখক্তংদি থমজগে৷ মদুদি,

১) লাই হরাওবদা য়ারিবমখৈ ঙনখৎনা লোইশিন্নবা পুন্না তান্নমিন্নরগা তৌদবা য়াদবা থৌশিল অমা শেম্বীবা৷

২) শীজিন্নরিবা খোঞ্জেল (মাইক) অদু লাইবুংগী অকোয়বদগী থাপ্না চৎখিদবা থৌশিল শেমদুনা তৌদবা য়াদবা চৎনবী ওইহনবা৷

মপুং ওইবদা হিরম অনী অসি থবক্তা ওন্থোকপা ঙম্লগদি খুন্নাই অসিদা য়াম্না কান্নগনি খল্লি৷

অদোমগী

এল মোধুচন্দ্র

ময়াং ইম্ফাল বজার

Ads