May 25, 2018/ Todays e-paper

ইল্লিগেল মাইগ্রেন্ট পুশিল্লকপা গাড়িশিংগী ত্রান্সপোর্ট লাইসেন্স ককথৎকদবনি


15th May 2018

       ম্যান্মার অমসুং বাংলাদেশ লোমদগী লোন্না থুপ্না ইল্লিগেল মাইগ্রেন্টশিং চঙশিল্লকপা থিংনবা সরকারনা ফনা কন্না হোৎনরবসু শেল খক্কী খল্লগা মীওই কয়া অমনা ইল্লিগেল মাইগ্রেন্টশিং লোৎনা থুপ্না পুশিল্লকপগী থৌওংশিং লেপ্তনা চত্থরকপা অসিনা মপুং ফানা মায় পাকপা হায়বদু ঙমদ্রি৷ লোৎনা থুপ্না চঙলক্লিবা ইল্লিগ্রেন্ট মাইগ্রেন্টশিং অদু মখোয়গা লোল, জাতি অমসুং লাইনিং মান্নবা ওইবনা ইরাই লাইনা খঙদোক্নবা হোৎনবা হায়বসি অরাইবা অমদি নত্তে৷


ইন্দিয়ান সিটিজেননি হায়বা শক তাক্ননবা অধার কার্দ অসি সুপ্রিম কোর্টকী অনৌবা রুল্লিং মতুং ইন্না মীপুম খুদিংমক মেন্দেটরি ওইদ্রবসু হৌজিক ফাওবগী ওইনদি লম্বী চৎথোক চৎশিনদা অধার কার্দ অমসুং ভোটর কার্দনা শীজিন্নরি৷ সরকারগী মায়কৈদগীসু অধার কার্দশিং অসি হেক য়ারিবমখৈ থুনা মীয়ামদা ফংহন্নবা হায়দুনা কম্মান্দ সার্ভিস সেন্টর কয়া অমা অয়াবা পীদুনা হাংদোক্লিবশিংগী মরক্তা খরনা মসিবু লান্না শীজিন্নরক্তুনা সেন্টরশিং অসি ককথৎলগনি হায়না চিফ মিনিষ্টরনা লাওথোকখিবা অসিমকসু য়াম্না শীংথানিংঙাই ওইবা খোঙথাংনি৷ অদুবু মসিনা সোলুসন অমদি নৎতে৷

থবক অমা মায় পাক্না পাঙথোকপা হায়বসি লো ইনফোর্সিং এজেন্সিশিংগী সিন্সরিটিগী মখা য়াম্না পোল্লি৷ মসিগী মথক্তা গভর্নমেন্টনা রাজনিতিগী মীৎয়েংদা থবক তৌবগী মহুৎতা পেট্রিওটিজমনা মাঙ থারগা থবক তৌরম্লবদি ঙসি লমদম অসিনা হিরম খুদিংমক্তা শোত্থরিবা অমসুং চয়েৎ- খোয়েৎনবা কয়া অমা লৈরিবসি থোক্লমদবসু য়াই৷ মমাঙদা লৈখিবা অরানবশিং অদু চুমথোক্নবা হোৎনবা হায়বদুদি অৱাবা ওইগনি৷ মতুংদা থোক্তনবা করি খোঙথাংশিং লৌখৎকদগে হায়বরোমদা হেন্না মায় ওনশিনবা চুমগনি৷ অদুবু থবক অমা মায় পাক্না পাঙথোকপা হায়বসিদা অকনবা অাইন অমসু মথৌ তাই৷ লোৎনা থুপ্না চঙশিল্লকপা ইল্লিগেল মাইগ্রেন্টশিং মরমদা হলহনখিনবা সেন্টরগী মতেং অমসু মথৌ তাই৷ মদু নৎতদুনা মশক খঙলবা ইল্লিগেল মাইগ্রেন্টশিং ফারগা জেলদা থম্বা হায়বসিদি মণিপুরগী লৈরিবা জেলশিং অসিদা মীওই কয়া থম্বা ঙমগদৌরিবনো? জেলগী টার্ম লোইরগা মরমদা হলহনখিবা য়াগদৌরিব্রা? সরকারনা ফনা কন্না হোৎনরবসু ইল্লিগেল মাইগ্রেন্টশিং হুরান লান্নাদা চঙশিল্লকপা অসিদি অদুমক থিংবদা ৱারগদবা অমনি৷ অদুনা সরকার অসিনা করি করম তৌরগা হেন্না শাফগদগে, হেন্না ইফেক্তিভ ওইগদগে হায়বদু ইন্টলেকচুয়েলশিং অমসুং লো ইনফোর্সিং এজেন্সিগী মকোক থোংবশিং য়াওনা খন্নবগা লোয়ননা সেন্টরদসু মসি থিংনবা মথৌ তাবা থবকশিং পায়খৎনবা তকশিনবা মথৌ তাই৷ মসিগা লোয়ননা ইলিগেল মাইগ্রেন্টশিং লমদম অসিদা চঙলক্নবা হোৎনবদা মতেং পাংলিবশিং খ্বাইদগী হেন্না কনবা চৈরাক অদু পীননবা ষ্টেট অসিগী ওইবা বিল অমা পাস তৌবা মথৌ তাই৷ পেসেঞ্জরশিং পুথোক-পুশিন তৌরিবা ত্রান্সপোর্টরশিংগীসু মসিদা অচৌবা দায়ত্ব অমা য়াওরিবনি৷ শেল খক্কী খল্লগা থবক তৌবা, পুকচেল শেংদবা ত্রান্সপোর্টর কয়া অমা য়াওবনা ইম্ফাল- মোরে লম্বী অমসুং ইম্ফাল-জিরিবাম লম্বীগী মফম কয়াদা সেক্যুরিতিনা চেক তৌবদা ফা-পুনবগী থৌদোক কয়া তোয়না থোক্লিবা অসিনি৷ অসিগুম্বা কয়া অসি লৈবনা গাড়িগা মরী লৈনবা এসোসিয়েসনশিংনসু অকনবা মীৎয়েং চঙফম থোকই৷ অাইন্না য়াদবা পোৎ অমা কনাগুম্বনা পুরম্লবদি গাড়িগী মীওইশিং ফা-পুনবা তৌরিবা অদুগুম্না ইল্লিগেল মাইগ্রেন্টশিং পুশিল্লকপা গাড়িশিংগী ত্রান্সপোর্ট লাইসেন্স কক্কদবনি৷ থবক তৌবদা অাইরন হেন্দ অমা য়াওদবদি য়ারোই৷

মেইনলেন্দ ইন্দিয়াগী মফম অতৈদা ইল্লিগেল মাইগ্রেন্টশিং চঙলকপগী ইশু অসিগা মণিপুর অমসুং নোর্থ ইষ্ট ইন্দিয়াগী ষ্টেটশিংগদি য়াম্না খেন্নগনি৷ মপুং ওইনা নোর্থ ইষ্ট ষ্টেটশিং অসিদি বাংলাদেশ অমসুং ম্যান্মারগা নক্নবা বোর্দর ষ্টেটশিং ওইবগী মথক্তা পোরস বোর্দর কয়া অমা লৈবনা ইল্লিগেল মাইগ্রেন্টশিং থিংবা হায়বসি অরাইবা অমা নত্তে৷ মসিগী মথক্তা মণিপুরগী লমখৈগী শরুক্তা লৈরিবা চীংগী জগাশিংদা খুন্দারিবা জাতি ফুরুপশিংগা লোল অমসুং লাইনিং মান্নবগী মথক্তা জাতি মান্নবসু য়াওরি৷ সরকারগী মায়কৈদগীসু চীংগী খুলশিং অসি অয়াম্বনা সেন্সস ভিল্লেজ ওইদবনা অতোপ্পা মীওই কয়া চঙশিল্লক্লগা খুন্দাশিল্লবগে, খুন্দারিবশিং অদু হান্নদগী লৈরক্লবা মীওইরা নত্রগা অনৌবা চঙশিল্লকপ্রা হায়বদু ভেরিফাইদ তৌবা ঙমদবনা ইল্লিগেল মাইগ্রেন্টশিংনা মসিগী খুদোংচাবা অসি লৌদুনা মশিং খঙদনা ইল্লিগেল মাইগ্রেন্টশিং লোৎনা থুপ্না চঙশিল্লক্লগা চীংগী মফম কয়াদা খুন্দাশিল্লম্লবা মতুং ইন্দিজিনস পিপল অমনি হায়না ক্লেইম তৌদুনা মখোয়গী চাকথুংশিং লৌবা কয়াসু য়াওরম্লোই হায়নিংঙাই লৈতে৷ মরম অদুনা ভারত সরকারনা মণিপুর য়াওনা নোর্থ ইষ্ট ষ্টেটশিংগী ওইনদি ইল্লিগেল মাইগ্রেন্টশিং চঙলকপা থিংনবগী পোলিসি অসি তোঙানবা মওং অমদা শেম্বা মথৌ তাই৷

লোৎনা থুপ্না চঙশিল্লকখিবা ইল্লিগেল মাইগ্রেন্টশিং মরমদা হলহন্নবা হোৎনবদা চেন্নরিবা লৈবাক অদুনসু ইরাই লাইনা লৌশিল্লু হায়বদু য়ারক্লোই৷ মসিগী মথক্তা রিফ্যুজিশিং চঙজফম পীগদবনি হায়বা বোদি অমসু লৈরিবনি৷ মসিমক্না ঙসি ইন্দিয়ানা য়াদ্রবসু য়ুএন না রোহিংয়া রিফ্যুজিশিং চঙজফম পীগদবনি হায়বা অকনবা প্রেসর মায়োক্নরিবনি৷ অদুনা মখোয়বু চঙহন্দনবা হোৎনবা হায়বা অসিদগী হেন্না ফবা পোলিসি অমা লৈতবনা হেন্না ইফেক্তিভ ওইগদবা মওংদা অখন্নবা থৌরাংশিং পায়খৎফম থোকই৷

ভরা শাল্লিবশিংদসু সরকারগী ওইবা থৌরাংগী মখাদা মীৎয়েং চঙফম থোকই৷ মরু ওইনা ভরাদা মীওই অমা লৈগে হায়বা তারবসু ভারত সংবিধান্না শকখঙলবা লোকেল বোদিশিংগী অয়াবা লৌবগা লোয়ননা মখোয়শিং অদু ইন্দিয়ান সিটিজেননি নত্রগা অতোপ্পশিংনি হায়বদু খঙননবা মরী লৈনবা পুলিস ষ্টেসনশিংদগী সার্টিফিকেট অমা শুকশোয় শোয়দনা লৌহনফম থোকই৷ মসিনা ক্রাইম কয়াদগী থিংনবা হোৎনবা অমসুং মীতোপ মীয়ানচাশিং খন্দোকপদা অচৌবা মতেং অমা ওইগদবনা ষ্টেট সরকারনা টেনান্ট লো অমসু শেমদুনা ইনফোর্স তৌবা মথৌ তারি৷

Ads