May 25, 2018/ Todays e-paper

রোলসিনা ইহেন হেল্লি হায়বা লৈজদে - রেশমি


25th April 2018

            ‘‘ষ্ট্রেস হায়বসি মীপুম খুদিংমক্তা অদুমক লৈনবা ঙাক্তনি৷ মসি ঐগী এক্টিং ৱার্ক মনুংদসু অদুম লৈরকপা য়াওরকই অদুবু মতাং মতমদুগী ওইনদি ঐনা তৌরুরিবা থবক অদুনা হেন্না মরুওইবনিনা ৱাখল ফাথজরগা তৌরিবা থবক্তুদা পুক্নিং চিংশিন্নবা হোৎনজৈ৷ মরমদি ঐঙোন্দা ফাউরিবা ষ্ট্রেস অদুদি ঐ ইথন্তগী ওইবা প্রোব্লেমনি অদুগা তৌরিবা থবক্তুনা ময়াম পুন্না তৌমিন্নবনিনা ঐ অমনা শোয়খিবদা অশোয়বা ময়াম অমা মথং মথং লাকপসু য়াই’’ হায়না এক্ট্রেস রেশমিনা ‘সন্দে স্পিসিয়েল পেজ’ দা হায়রি৷ সোরোখাইবম রঞ্জন অমদি সোরোখাইবম ওংবী মেরিনা অনিগী মচানুপী রেশমি ইং ১৯৯৫ গী ফেব্রুৱারী ২৭, নিংথৌকাবা নুমিৎতা য়াইস্কুল হিরুহনবা লৈকাইদা পোকই৷ অঙাং ওইরিঙৈদগী হৌনা জগোই অমসুং অার্ট এক্টিংদা অদুক্কী মতিক থৱায় য়াওনা হৌরকখিবী এক্টর অসিনা করিবু ফোংদোক্নিংলিবা -


থৌদাং ঃ ফিল্ম এক্টিংদা চংলক্ত্রিঙৈদা রেশমিনা অতোপ্পা ফিল্ম কয়াদা চংনিংবগী অপাম্বদি লৈখিদব্রা?

রেশমি ঃ ঐগী ওইনদি থোইদোকপা লৈজরক্তে, জগোই অমদি অার্ট এক্টিংনা লাইনিং ওইজরকই৷

থৌদাং ঃ করম্বা অপাম্বা, অনিংবা অমা লৈবদগী ফিল্ম এক্টিংদা চঙলকখিবনো?

রেশমি ঃ পুন্সিদা মী ওইনা পোক্লগদি ঐ ঐনা চান্নগদবা লম্বী অমদা চৎখিবনা ফৈ হায়বসি ঐগী থাজজবনি৷ অার্টকী লম্বীসিদা ঐগা চান্নগনি খল্লুবদগী চঙলকখিবনি অদুগা মসিগী লম্বী অসিদা ঐ অমনা চৎলম্মী হায়বগী কন্ত্রিব্যুসন খরা তৌরম্বা ঙমগদ্রা হায়না পুক্নিংনা লেপখিবদগী চঙলকখিবনি৷

থৌদাং ঃ অসুম্না ফিল্ম অার্টতা নোংমদি চঙলক্কনি হায়বগী ৱাখল অসিদি খনখিবা লৈব্রা?

রেশমি ঃ মসিগী লম অসিদা চঙলক্নবগী ৱাখল নত্রগা ইথিল অদুমক্তি ঐগা হেক য়ুমথংমিন্নরিবা পাবুং লাইময়ুম ধনচন্দ্রগী মাণ্ডপতা ব্রাইট ফিল্মস মণিপুরনা হেক হেক পাঙথোকপা ‘দ্বান ২০০০’ হৌরকপগী স্কৃন্নিং অমদি রিহার্সেল তৌবা উরুবদগীনি৷ মদুনা পীক্লিঙৈ মতমদগী ঐঙোন্দা অচৌবা ইন্সপিরেসন অমসু ওইখি৷

থৌদাং ঃ করম্বা ম্যুজিকেল এলবমনা রেশমিগী অহানবা ওইখি৷ হৌজিক ফাওবদা পুন্না ম্যুজিক এলবম কয়া শুখ্রে৷

রেশমি ঃ দাদা হেমন্তগী ‘নুংশি শাহুম’ না এলবমদা অহানবনি৷ পুন্না হৌজিক ফাউবদা ১০ মুক শুখ্রে৷

থৌদাং ঃ হৌজিক্তী নৌরিবা ফিল্ম এক্টিংবু পামজবশিংগীদমক্তদি ম্যুজিক এলবম অসিনা প্লেটফোর্ম অমনি হায়বসি য়ানিংব্রা?

রেশমি ঃ তশেংনমক্কীদি এলবম হায়বসিনা ফিল্ম এক্টিংগী প্লেটফোর্ম অমনি অদুগা ঐগী ওইনদি ফিল্মনা হাঞ্জখি৷ ঐখোয়গী লমদমসিদদি এক্টিংগী ওইবা মতিক চাবা অফবা ইন্সটিট্যুট লৈতবনিনা তঙায়ফদনা এলবমসিনা প্লেটফোর্ম অমা ওই হায়বসিমদি য়াজনিংই৷

থৌদাং ঃ ইহান হান্না কুমখিবা ফিল্ম অদু করিনো? অদুগা করম্বা রোল খঙখি৷

রেশমি ঃ ঐগী অহানবা ফিল্মদি ও সি মৈরাগী ‘শকহেনবী ইতৈমা’ নি৷ ফিল্মসিদা ঐনা কবি অমগী রোল লৌজখি৷

থৌদাং ঃ নহাক্কী কেরিয়র অসি হৌরকপদগী হৌনা হৌজিক ফাওবদা করম্বা ফিভম অমা নত্রগা থৌওং অমনা নহাক্কী খ্বায়দগী চাউথোকচনিংঙাই হায়বদু ওইখি অমদি করম্না মদুবু ওইহনখি৷

রেশমি ঃ ঐগী কেরিয়র অসি হৌরকপদগী হৌনা ফিল্ম অমদি থিয়েটর অনি অসি পুন্না চৎমিন্নরকপনি৷ ঐগী ওইনা চাউথোকচনিংঙাস হায়রগদি ওরিষ্যাদা ইন্টরনেসনেল থিয়েটর ওলেম্পিক কম্পিটিসনগী শরুক য়াখিবদা বেষ্ট এক্ট্রেসকী মনা খঙখিবগী তাঞ্জা অদুনি হায়জনিংই৷ মদুসু ঐগী ওজা, গুরুনা তাকপী তম্বীবদা থৱায় য়াওরুবা মরম্না ওইখিবনি খঞ্জৈ৷

থৌদাং ঃ এক্টিংগী থোইদোকপা মফম অমা কনবা ঙম্নবগীদমক্তা করি করি খনবা লৈ অমদি করম মরম্বা মগুনশিংনা নহাকপু এক্টিংদা মতিক চারবা মীওই অমা ওইহনবা ঙমগনি হায়না লৌই৷

রেশমি ঃ এক্টিংদা থোইদোকপা মফম অমা কনগে হায়রগদি দিরেক্টরনা অপীবা রোল খুদিংমক্তা চাউবা পীকপা থিদনা পামজনা হোৎনবদুনা মতিক চাবা এক্টর অমা ওইহনগনি লৌজৈ৷

থৌদাং ঃ মিংচৎ থম্বা ঙম্লবা এক্টর অমা ওহে(00FC)রগে হায়বগী অশাসু লৈরবনিনা করিগুম্বদা নঙগী হোৎনজমনগী চাং অদু হন্থখিবা মতমদা করম্না খনবা ঙমগনি৷

রেশমি ঃ পুন্সি হায়বসিদি অমুকসু হেঙ্গৎকনি অমুকসু হন্থগনি৷ করিগুম্বদা হন্থরকপা থোক্লবসু নিংহন্নবা লৈতনা ঐগী করি করম্বা অশোয়বনা হন্থহল্লক্লিবনো হায়বদু থিদোক্লগা এরিয়া অদুদা হেন্না ষ্টদি তৌরগা হোৎনগনি৷

থৌদাং ঃ এক্টিং ইন্দষ্ট্রিদা নহাক্কী রোল মোদেল অদু কনানো? করিগীদমক ওইরুরিবনো?

রেশমি ঃ ঐগী রোল মোদেল হায়রগদি লৈখিদ্রবী লাইময়ুম ওংবী সিমানি৷ মঙোন্দা এক্টিংগী এক্সপরিয়েন্স ফজনা লৈখি৷ মসিগী ঐখক্তগী ৱা নত্তে, মাবু পামজবা, মাগী এপ্পিয়ারেন্সতা য়ানিংদবা মীশিং অতাংবনি৷ রোল খুুদিংমক্তা নেগটিভ, পোজিটিভ হায়বা লৈতনা রোল কয়া মায় পাক্না পুদুনা অয়েংবশিংগী থম্মোয়বু শুম্হৎপা ঙমখিবীনি৷

থৌদাং ঃ করম্বা মখলগী এক্টিং রোলদা নহাক্না খ্বায়দগী হেন্না ইন্টরেষ্ট পোকপগে অমদি করিগীদমক্তনো?

রেশমি ঃ ঐগী ওইনদি মসিগী রোলসিনা ইহেন হেল্লি হায়বা লৈজদ্রি, দিরেক্টরনা অপীবা রোল খুদিংমক্তা লোয়নমক ইন্টরেষ্ট পোকচৈ৷

থৌদাং ঃ এক্টিং প্রোফেসন হায়বসিদসু তৌহন্নিংবা, হেন্না ইন্সপ্যয়র তৌবীবসি য়াম্না মরুওই অদুনা নহাক্কী মোটিভেটর ওইরিবশিং অদুদা করি হায়বা পাম্লী৷

রেশমি ঃ ঐনা ঐগী কেরিয়রসি ষ্ট্যেয়র অমগুম্না খঞ্জৈ৷ ঐদি হৌজিক ষ্ট্যেয়রগী ষ্টেপ অমখক্তং কাবা হৌবদা ঙায়রি হায়না খল্লি৷ মসিগা লোয়ননা কাখৎখিগদবা ৱাৎলিবা ষ্টেপশিংগী খোঙফম কাবা ঙম্ননবসু কন্না হোৎনরি৷

থৌদাং ঃ খল্লিবা অমদি হোৎনরিবশিং পুম্নমক রেশমিদা মঙফাওনগনি হায়বগী থাজবসু পাউ-চে অসিগী মায়কৈদগী থমজরি৷

রেশমি ঃ থাজবা থম্বীবগীদমক্তা হন্না হন্না ঐহাক্নসু পাউ-চে অসিদা হরাও-নুংঙাইবা ফোংদোকচরি৷

থৌদাং ঃ থাগৎচরি৷

Ads