May 25, 2018/ Todays e-paper

অমুক্তং হোংদোক্তুনা কমদৌবগে হায়বদু য়েংসি


12th May 2018

ঙসি মালেম শিন থুংনা শাফু কন্না নমখায়রক্লিবা গ্লোবেলাইজেসনগী নান্থোকপা য়াররোইদবা অকনবা ঈচেলসিবু মায়োক্ননবগীদমক শেম শাহৌদবা অপীকপা খুন্নাই অমসুং ফুরুপশিংবু য়োৎশিনখিদুনা মশাগী তোপ তোপ্পা শক্তম পুমমাং মাংহনখিগদবা খুদোংথিবা অহুম মায়োক্নহনবা হৌরে হায়বসি খঙমিন্নবগী মতম ওইরে৷


মণিপুরসু ভারত লৈঙাক্কী‘এক্ট-ইষ্ট পোলিসি’গী খুত্থাংদা গ্লোবেলাইজেসনগী অকনবা ঈচেলগী শাফু অদু মপুং ফানা খঙবা হৌরক্লে৷ অসিগুম্লবা তানফম অসিদা মণিপুরগী তোপ তোপ্পা শক্তম ঙাক্তুনা থম্নবগীদমক গ্লোবেলাইজেসনগী চৈথেং মায়োক্ননবা শেম শাবদা মণিপুরী ফিল্মনা অচৌবা থৌদাং লৌদবা য়ারক্লোই৷ লৌফমসু থোকই৷ মরম অসিনা মণিপুরী ফিল্মনা ঐখোয়গী খুন্নাই অসিগী ফুরুপশিংগী তোপ তোপ্পা শক্তম ঙাক্নবসু হোৎনগদবনি৷

মণিপুরগী নেসনেল অাইদেন্টিটি হায়বসি মণিপুরীগী তোঙান তোঙানবা ফুরুপ পুম্নমক্না মশাগী তোপ তোপ্পা শক-চু, মশাগী নুংপানগী ওইবা লিচৎ-শাজৎ, ৱাখল মীৎয়েং অমসুং অার্ট এন্দ এস্থেটিক হায়বদি ঐখোয়গী পুন্সিরোলদা, ঐখোয়গী ইশাগী শক্তম নিংতমহনবা অদুনি৷ অদুনা ঐখোয়গী নেসনেল অাইদেন্টিটি ঙাকপা হায়বসিনা মালেমগী ওইবা সাইন্স অমসুং মোর্দনাইজেসনগী ঈচেল মশক খঙনা, মদুনা ঐখোয়গী লৈবাক খুন্নাই অসিগী অফবা শক্লোন, শক্তমশিংগী লিক্লমদি কায়হন্দনা মণিপুরগী ইতিহাস, কলচর অমসুং মীতৌ তমদ্রিবা খুন্নাই অমগী লিচৎ-শাজৎতা য়ুম্ফম ওইবা অনৌবা মতমগী পুন্সিরোল অমা শেমগৎপা অদুনি৷

অসিগুম্বা অনৌবা পুন্সিরোল অসিগী মীৎয়েং পীবা ফোঙদোক্লোন অমসুং চাউখৎ লম্বী থিবদা প্রোগেসিভ দিমোক্রেটিক এক্সপরিয়েন্সতগী অৱাৎপা লৈতনা শেমগৎনবা মণিপুরী ফিল্মদা য়াম্না কম্মিটমেন্ট লৈবা মেকর তঙায়ফদ্রে৷ মতাং অসিদা ফিল্ম অমসুং ফিল্ম পুথোক্লিবশিংনা মমাংদা লৈখিবা অশোয়বশিং, অরানবা ৱাখল মীৎয়েংশিং অদু হোংদোকক্তুনা পার্টিসিপেটরি দিভেলপমেন্টকী লম্বীদা মীয়াম্বু ইন্সপায়র তৌবা হায়বসি ফিল্ম পুথোক্লিবা অমসুং শেম্লিবশিংগী মখুত্তা লৈ৷ সাউথ এসিয়া অমসুং অতৈ মালেমগী লৈবাকশিংদা তৌবগুম্না ডিজিটেল নত্রগা ভিদিও ফোর্মেটতা নম্বা ফিল্মশিংবু হান্নগী সেল্যুলোইদ ফিল্মগা চপ মান্ননা লৌদুনা ডিজিটেল ফিল্ম ইন্দষ্ট্রিবু য়োকখৎপা অমসুং নৌনা মপাঙ্গল লৈহনফম থোকই৷

মালেমগী ফিল্ম লমজেলদা মাংজিন থানা লৈরিবা হোল্লিৱুদ তগী থাদোরকপা স্পিসিয়েল ইফেক্টশিংতনা য়োম্লবা দ্রিম, ফেন্টাসি অমসুং এক্সন থ্রিল্লরনা মপুং ওইরবা ফিল্ম কয়া মালেমগী ভাবকশিংনা য়েংনিংবা পোত্ক্রবনি৷ অদুনা মালেমগী অচৌ অচৌবা ফিল্ম ফেষ্টিভেলশিংদা হোল্লিৱুদপু মায়থিবা পীদুনা ইরায় লাইনা চাইনা, জপান, কোরিয়ানচিংবা পীক্লবা লৈবাকশিং অসিনা খুদুম চনবা ঙমখ্রবনি৷ অসিগুম্বা চৈরক অসিদা মণিপুরী ফিচর ফিল্মনা ফিজেৎ চাকশেৎ অমসুং লৈতেংদা মপান লমগী মতৌ লৌবা অমদি লৈতেংগী পোৎলমশিং শিজিন্নদুনা ফিল্মগী ৱারী পরিংগা মরী লৈনহনবা, ভাবনা শাগৎপা মরিং-মরাংবা ঈশৈ, ৱাকোই শুবা দাইলগ পরেং, মতাং মতম য়েংদনা জগোই হেক্তা হাপচিনবা কয়া অসি ফনা য়াম্নদি থাদোক্নরে হায়ববু অদুমক ইহোং হোংদোকপদি ঙমদ্রি৷ মরু ওইনা ফিল্মগী টাইটল পীবা অমসুং ক্রাইম, ভাইওলেন্স, কা হেঞ্জিনবা মানবা রোমান্সকি সিনশিং অসিনি৷

অকায়বা পীরকপা য়াবা মচাকশিং অসি মণিপুর ফিল্মদা মমি তাদনগীদমক ফিল্ম ফোরম মণিপুরনা মতম মতমগী ওইবা খোংথাং কয়া লৌখৎলবসু কল্লেক্টিভ সপ্পোর্ট অমা মপুং ফানা পিদ্রিবমখৈদি ঐখোয়গী অাইদেন্টিটি অমসুং কলচরেল ইফেক্টশিংদা য়ুম্ফম ওইদুনা অফবা ফিল্ম পুথোক্নবগী লম্বী শেম্নবসু খুরৌ থাংবদি অদুম্মক ওইরি৷ মণিপুরী সিনেমাদা মরু ওইনা প্রদক্সনগী মীৎয়েংদা চাওনা অৱাৎপা অমা ওইরিবসি স্কৃপ্টিং ৱার্ক অসিনি৷ সবজেক্ট ফজবা খনবা, থিমেটিক কন্টেন্ট ফজনা য়াওবা ষ্টোরি লাইন লৌখৎপা ৱাৎপনা মণিপুর ফিল্মগী মগুন অসি হন্থহল্লকপনি৷ তশেংনা ঙসি ঙসিমক চংশিল্লক্লিবা ডিজিটেল অমদি ডিজিটেল সিনেমাগী পেরিওদ অসিদা ডিজিটেল ফিল্মগী মেকিং অসিনা ঐখোয়গী ফিল্ম তৌজরিবশিংগীদি অচৌবা স্কুল্লিং অমনি হায়বা তারবসু অফবা প্রদক্ট পুথোকপগী চাংদি য়াম্না নেম্না লৈরি৷ মসিদা ফিল্ম টেক্নোলোজিগী ওইবা ইক্বিপমেন্টস অমদি টেক্নিকেল এস্পেক্টশিংদি তোখায়না থমখ্রগা সবজেক্ট খনবা, থিবা হৈতবা অসিনা মণিপুরী ফিল্ম মেকরশিংগী থোইদোক্না অশোনবা অমনি হায়না লৌবা য়াই৷ রোমান্স অমদি ভাইওলেন্সনা মপুং ওইবা ফিল্ম টেক্স থাদোক্লগা লমদম অসিগী অমদি খুন্নাইগী কান্নগদবা সবজেক্ট কয়া থিদুনা ফিল্ম পুথোকপা অমদি লমদমসিগী মীওয় পুম্নমক্নসু পুন্না কল্লেক্টিভ ৱজদম অমা পীদুনা মণিপুরী ফিল্ম হেন্না চাউখৎপা অমদি অনৌনা লম্বী অমদা চংখিনবগী তাঞ্জা অদু নৌহৌননা পীমিন্নরসি৷

Ads