May 25, 2018/ Todays e-paper

শগোল গাড়ি থৌবা গুলামদিন


12th May 2018

(মীতৈরোলদা ইথোক্লিবা তোংব্রম গুলামজাৎ )

গুলাবদাস ব্রোকরগী

হান্নগী মখাঃ

খুদক্তুদা ঐনা, নুপীদুগী গুলাপকুম থোৎলবা খজাই, চুং ফিরাল চারবা শাবান, য়েংবদা ফজরবা চিনবাল, লাওরপ তৌনা শুম্হৎয়াই চেল্লবা মমিৎ অনী, মশাদা য়াওরিবা চীং লেম্না ফজবা পুম্নমক্তু উরুবদা ঐগী থম্মোয়দা মুত্থৎপা য়াদবা মমি অমা তাহৌই৷

ঐনা পুক্নিংদা ইথন্তা খল্লম্মী, তোঙ্গালৱালাদু নুংশি নুংওন্দা তাওবা মীশক অমা ওইরমগনি৷ ঐনা মঙোন্দা য়েংলম্মী৷ অদুগা ঐখোয়না হৌজিক্তা হেনগৎলক্লিবী শুম্হৎনিংঙাই ওইরবী নুপীদুদসু অমুক হন্না য়েংলম্মী৷ তোঙ্গাৱালাদু ঙাইহাক্তং ৱাখল খনবগুম তৌরম্মী৷ তশেংনা মাগী ওইবা ৱারেপ অমা লৌননবা মহাক কন্না হোৎনরিবগুম তৌরম্মী৷ অদুদগী মহাক্না খুদক্তা মাগী শগোল গাড়ি তোঙ্গাদু খঙলেপ লেপ্লম্মী৷ অদুগা গাড়িদুদগী মশাদু চোংথখ্রগা সড়ক্তুদা হনখ্রগা কন্না চেনখিরম্মী৷

ঐগী নুপীনা ঐঙোন্দা হায়রকই, ‘ মখোয় অনীগী মরক্তা করিগুম্বা খরা লৈরমগদবা মাল্লি৷’

ঐনা পাউখুম পীরম্মী, ‘ নুপীসি ওন্থোক্না মশক ফজৈ৷’

ঐগী ইচাশিংদুগী মরক্তগী অমনা হংলকই, ‘ পাবা, নুপাসিনা করিগী নুপীসিগী মনাক্তা চেনখ্রিবনো?’

অদুদগী ঙাইহাক তুমিন্না লৈরগা মখোয়না ঐখোয়রোমদা চঙশিল্লকপদুদা ঐ মুন্না য়েংলম্মী৷ নুপীদুগী চিনবান্দুদা হায়রপ নোকপগী মমি অমদি তারম্মী৷ অদুগা নুপাদুনদি নুপীদুদা করিগুম্বা খরা য়াবীনবা হায়জ-চৎনরিবা মাল্লি৷ অসুম্না মখোয় অনী লাকমিন্নবদুনা ঐখোয়না তোঙলিবা শগোল গাড়িদু য়ৌগদবা খোঙথাং খরদং ঙাইরক্লবদা নুপাদু চেন-চৎ চৎতুনা লাক্লগা মাগী শগোলগাড়িদুগী থৌনবগী ফম্ফমদুদা ফমখ্রে৷

শগোলগী খুর্জিদু পায়রগা, মহাক্না শগোলদু চৎহনবা হৌরক্লবা মতমদুদা মানা নুপীদুদা হায়রক্লম্মী, ‘ হয়েং নুমিদাংৱাইরম মফমসিমক্তদা শোয়দনা লাকউকো, লাক্তবা য়াদেকো৷’

নুপীদুনসু পাউখুম ওইনা হায়রপ মোমোন নোক্লম্মী৷ মদুগী ফজবা মতৌদু ঐগী থম্মোয়দা অনীশুবা ওইনা অমুকসু মমি তাহৌরে৷

হৌজিক্তি শগোলদুনা সড়ক্তুদা চৎপগী তপ তপ লাওবগী খোঞ্জেলদু তশেং-তশেংনা তারে৷ তোঙ্গাৱালাদুগী নাকলদা ফম্লিবা ঐগী ইচানুপা, ঐগী নুপী, পুম্নমক্না তোঙ্গাৱালাদুগী মায়থোংদুদা করেম-কথাইনরপ তৌনা য়েংলম্মী৷

মাগী মায়থোংদুদা য়াম্না শাত্থিবা মানবগী মমি তারম্বদুদি মাঙখ্রে, অদুগী মহুৎতা য়াম্না থোৎপা, মেঙবা, চীংলেম্বগী মতৌ অমা য়াওরক্লে৷ মাগী চিনবালদুদা মোমোন নোকপগী মমি অমা তাদুনা অদুম লৈবগুম্মী৷ গাড়িদু থৌবগা লোয়ননা মাগী মীৎয়েংদু সড়ক্তুদা থম্লে৷

ঐসু মঙোন্দা করিমত্তা হায়রুদরে৷ অদুবু ঐগী মীৎয়েংদুদি মাগী মায়থোংদুদা থম্লি৷ ঙাইহাক্কী মতুংদা ঐঙোন্দা ওনশিল্লপ তৌরগা মানা হায়রকই, ‘ সেথজি, অদোম্না হৌজিক্কী নুপীদু উরবা নৎত্রা?’

‘ হোয়, তশেংনা উহৌরে৷ অদুবু নঙনা ৱাহংসি ঐঙোন্দা হংলিবদু করিগীনো?’

মহাক্না তপ্লপ্না খুম্লকই, ‘ মতম অমদা মহাকসি ঐগী নুপী ওইরম্মী৷’

অসি হায়রগা মাগী শগোল শাজৈদুনা শগোলদুগী মনঙ্গন্দা তপ্লপ্না ফুদুনা খোঞ্জেলদু খরা হেন্না চেন্নবা থৌরম্মী৷

ঐনা মঙোন্দা হংলম্মী, ‘ মতম অমদা হায়বা ! নঙনা হায়নিংলিবসি করিনো? হৌজিক্তি মহাক নঙগী নুপী ওইদ্রবরা?’

ঐগী নুপী অমদি ইচাশিং মহাক্না ঙাংলিবদু তশেং তশেংনা তারম্মী৷

নুপাদুনা খুম্লকখি, ‘ ওইদ্রে, ঐনা মাবু খায়নখ্রে৷’

‘করিগী?’

‘ইকাই খুম্নজরবা, মদু শাংখ্রবা ৱারীনি৷ অদোমগুম্বা য়াম্না নুংঙাই য়াইফবা মীশক অমনা লাইরবা ঐখোয়গুম্বগী ৱারীদা করি তানিংলুনি?’

‘লাইরবা মীশিংগী ৱারী হায়বা? মখোয়সু মীওইবগী ৱারীনি৷ ঐখোয় পুম্নমক মীওইবা ঙাক্তনি, নৎত্রনে?’

ঐগী ৱাহৈসিনা মাবু পেলহনবগুম তৌরম্মী৷ ‘ অচুম্বনি সেথজি, ফনা হায়দুনসু ঐখোয় পুম্নমক মীওইবা ঙাক্তনি৷ অদুবু ঐগী ৱারীদি শাংখ্রবা ৱারীনি৷ ঐনা কিজবদি ঐগী ৱারীসিদা অদোম্না হৈনিংবা পোকপীরোইদ্রা হায়বসিনি৷’

‘ঐখোয়না চৎকদৌরিবসি সহর পুম্বসি ফাওদুনা চৎকদৌবা নৎত্রা? মদুদা য়ামদ্রবদা পুং অমমুক্তি শোয়দনা চঙগনি৷ নঙগী ৱারীদা ঐখোয় করিগী হৈনিংদবা পোক্কদগে? অমরোমদা, নঙগী ৱারীদুনা ঐখোয়দা হেন্নদুম নুংঙাইবা পীগনি৷ শোয়দনা লীদবা য়ারোই৷ ৱারীদু ঐখোয়দা লীয়ু৷ হৌজিকমক লীয়ু৷’

মথং মথং

Ads