May 25, 2018/ Todays e-paper

অতোপ্পগী মতৌ তম্বা তোক্লসি


15th May 2018

Haorungbam Sarat Khuman -

           মীওইবা ঐখোয়সি ঐনা ঐনা ৱাখলসি লাল্লবসু চুম্মী হায়না খন্নৈ৷ অরানবদু অচুম্বা ওনখৎলগা, খঙশাও শাওবগী ফিভমসি ইতৎ তত্তনা থেংনরি৷ অতোপ্পা ৱাফম অমনা, করিসু খঙদবা পুন্সি হায়বসি করিনো খন্থবা ঙমদবা কয়ানা, অখঙ অহৈ শারগা তাকপী তম্বীসু য়াওরি৷ সমাজগী মিংশেলদা মমি তমদ্রিবা মীওইশিংনা , মখোয় মঙাইরে খনবদি লানগনি৷ অসুম্না , ৱাখল ইখন খন্দনা পংঙাং ঙাংবসি, মতিক চাবা মী নত্তে মতোমতা উৎচবনি৷ ৱাখল মান্নদবা মীগা ৱারী শান্নবদি , মতম মাঙননবনি৷ ৱা ঙাংদনা, লাপথোক্নবনা হেন্না ফৈ৷


সমাজসিদা অঙক অঙকপা মীশি য়াম্না লৈরম্মী৷ মশা মশাগীদা খনবা মীদগীনি ইজরিবসিনা খ্বাইদগী য়াম্না লাপ্না হিংলিবসি৷ কনাদগীসু করিসু পামদে৷ লাইরবশিংগী, অৱাবা তারবা তারবীশিংগী অঙম্বা মতেং পাংলম্বদুদি ঐহাক্কী পুন্সিদি৷ ইনাক খুনবা খুনবীশিং, ওফিসারশিংগীদি থম্মোয়সি লাপ্না থম্মী৷ মফম মরাং খঙদ্রবা মমা মপানা ঐহাক্কী ইচাদি ওফিসারনি৷ অসিনি অদুনি অদানি৷ হরিয়ানা গভর্নমেন্টনা সেনা মেদল ফংবদা লুপা লাক্ষ ২১ পীরি৷ মণিপুর গভর্নমেন্ট না লুপা ৪,০০০ খক করিগী পীরি? হায়বনচিংবা লাউ খোংদুনা পংঙাং ঙাংই৷ খ্বাইদগী ঙকপা অমনা হায়রিবা মীওইশিংসি ইন্টরনেটতগী দিটেলশিংদু লোইনমক খঙলগা ইজরিবসিদা খঙদবা শারগা অমুক হংলি৷ খন্থবা ঙমদরি করম্বা মফমদা হিংলি হায়বদু৷

চহী ২০ মুক রাজ্য সাইনিক বোর্দকী সেক্রেটরি ওইরিবা ঐহাকপু তাকপী তম্বীবা অার্মিগী মরমদা এবিসি খঙদবা কয়া অমসু লাক্লি৷ খঙদবা মীদদি খঙদবদু হায়বদা করিসু কায়দে৷ অদুগা খঙনা খঙনা মরী য়েৎপা লাকপা মতম মাঙহনবা লাকপা মীগদি ৱারী শান্ননিংদে অমসুং ৱারী শাবগী মতমদু অতোপ্পা থবক্তা শীজিন্নবা ফৈ খঞ্জৈ৷ রাজ্য সাইনিক বোর্দ ওফিসতা লাক্লিবা মীওই পুম্নমকসি করিগুম্বা প্রোব্লেম অমা নত্রগা অমদি লৈরগা লাক্লিবা ঙাক্তনি৷ ইন্দিয়াগী মনুংদা মণিপুর ষ্টেটগী রাজ্য সাইনিক বোর্দ ওফিস দৌনা অমত্তা তৌদে৷ খবরদা ইরগা সোলুসন হেক্তা ফংবা নত্তে৷

অঙকপা লৈবাক অসিদা অঙকপা থৌদোক ৱাথোক য়াম্না থোক্লি৷ ৱাখল ইখন- খন্দনা, উরাও থরাওবা লমদম অসিদা, য়াম্না শাংনা ইদরে৷ পুন্সি হায়বসিদি ইতোম ইতোমতা চৎকদৌবা লম্বী ওইরম্লে৷ পুন্সিগী লম্বীদা খুৎ শম্নরগা কয়া য়াম্না শাংনা চৎমিন্নবা য়ারিবগে য়েংবীয়ু৷ মাগী মাগী খুদোংচাবা লৌরগা, মমায় লৈখিবনা অয়াম্বনি৷ মশাগী খন্দনা, অতোপ্পগী খনবা মী য়াম্না তাঙলি৷ লৈবাক্কী ওইবা থবক অফবশিং পাঙথোক্ননবা হোৎনসি৷ ইশাগী হান্না খল্লোইসি৷

ঙসি ফাওবদা মণিপুরগী মীয়াম্না থম্মোয় শোক্না নুংঙাইতনা অমসুং নুংশিননা নিংশিংনিংঙাই ওইবা, ফম্নাইবা অনি শুদরি৷ অপীকপা মফম অসিদা চাওজনিংবা মী মশিং খঙদনা লৈখি অমসুং লৈরি৷ মসি ৱাখল খন্থবা ৱাৎতুনা তৌরিবনি৷ ষ্টেট এসেমব্লি হোলদা, ইন্দিয়াগী পার্লিয়ামেন্ট হাউসতা শুপ্নতগী মিনিট অনীখক লেপ্লগা পুন্সি লোইখিবা মী মশিংদি য়াম্না য়ামখরে৷ মীয়াম মরক্তগী শিংথানিংঙাই ওইবদি , ইয়াও য়াওদরি৷ মীওইবা ঐখোয়গী মরকসিদা শান্নরিবা লীলাসি য়াম্না ঙক্নিংঙাই ওইরি৷ খল্লুবদা, মঙগুম্বা মীওইবগী পুন্সিনি খন্থবা ঙমদে৷ মুন্না থিজিনবদা, খল্লুবদা তমজনিংঙাই ওইবসি ইয়াও য়াওরমদে৷ লৈরমদে৷ মীনম্বা মী ঙাক্তা ওইরম্লি৷

নুমিৎ খুদিংগী অয়ুক্তা নুমিৎসি থোক্লকপা উরি৷ উরিবা নুমিৎসি নুংতিগী চপ মান্ননা উরি৷ লাইরিকতনি য়াওরিবসি পৃথিবীনা নুমিৎপু কোইরগা চৎলি হায়বসি৷ অসুম্না পৃথিবীসিগী ফগৎননবদি পৃথিবীগী মীওই কয়ানবু খল্লিবগে? লেপ্তনা চৎলিবা মতম, পৃথিবীগী মরমদদি ঐখোয় অয়াম্বনা থোইনা খন্থরুদে৷ নোংমা নোংমগী পুন্সিসিদা ঐখোয় পুম্নমক্না করি করি অফবশিং পাঙথোক্লিবগে হায়বসিসু করিগুম্বা মতমদা খন্থনিংঙাই ওইরি৷ মীওইবা ঐখোয়গী ইরক্তা শান্নরিবা লিলাশিংসি ঙক্নিংঙাই ওইরি৷

পুন্সি হায়বসি পৈশা নত্তে৷ লন থুমসু নত্তে৷ ফম্নাইবা অচৌবা ওইরম্বসু নত্তে৷ মীওইবা জাতিগী, পৃথিবীসিগী অফবা খরা থবক ওইনা পাঙথোক্লম্বদুনি৷ মশানা মশাবু য়াম্না চাওরে খঞ্জবা নোংমদা দ্রেজ মশিং খঙদনা হোংলগা ৱাজাও ঙাংবনা শিংথানিংঙাই ওইবা মীনি হায়বদি ইতিহাসনা য়ারোই৷ ইতিহাস হায়বসিদি ঙাইহাক ঙাইহাক্কী থবকশিংদু নত্তে৷ ইতিহাসতি মতমনা মতোমতা পুরকচবা তমজনিংঙাই ওইরবা ৱারীশিংনি৷ অফবা থবক্কী ৱারীশিংনি৷

ঐখোয় মীওইবসি য়াম্না চাওখৎলে , ঐখোয়দগী হেনবা কনাসু থোইনা লৈতরে হায়না অয়াম্বনা খঞ্জৈ৷ অদুগা ঙসি ইম্ফালগী মফম অয়াম্বদা, তুরেলদা নালাদা, লম্বী সড়ক্কী ময়াদা লংথোক্লিবা ফত্ত-হাওদি ময়ামসি উবদা, ঐখোয় ময়ামগী ৱাখল থবকসিবু করম্বনো হায়বসি তোয়না খল্লি৷ য়ারবদি ফত্তবা পোৎচৈশিং অমত্তা, মফম চাদনা লংশিল্লোইসি৷ দষ্টবিনশিং , বোরাশিং, চেগী পেকেটশিংদা য়োমশিল্লগা মফম চানা পৈশিল্লি৷ পুমচাই চাইরিবসি অফবা মীশিংগী খুদম নত্তে৷ চাওখৎপা মীশিংগী থবক নত্তে৷ অসিগুম্বা নুংঙাইতবা সিনশিংসি৷

মণিপুর সমাজসি ৱাংখ্রবা অতিয়াদা পাইরিবা তেলঙ্গা অমগা চপ মান্নখরে৷ নুংশিৎনা হুম্বা মায়কৈদা, পায়রিবা তেলঙ্গা ওইখরে৷ মখল মখা কয়াগী চৎনবী অনৌবশিং তারি৷ মণিপুরগী থায়নগী চৎনবীশিং মাঙশিল্লক্লি৷ মরু ওইনা মতমসিগী নহাশিংনা মপালগী চৎনবীশিং লুহোংবা মতমদা পাঙথোক্লি৷ মসি মতম চানা থিংজিনহৌবা ফৈ খঞ্জৈ৷ সমাজগী চৎনবী হায়বসি মানা মানা পাম্বদু নত্তে৷

খ্বাইদগী ঙক্নিংঙাই ওইরিবদি, হৌজিক মণিপুর সমাজদা লুহোংবগী মতমদা ওইরক্লিবা মখল মথেলগী থবক থৌরমশিং অসিনি৷ রিং সেলেব্রেসন ফাওবা হোটেলদা পাঙথোক্নরে৷ লুহোংবগী নুমিৎতা পাঙথোক্লিবা মীৎকী , ঙাইহাক্কী দ্রামা অদুসু য়াম্না ঙক্নিংঙাই ওইরি৷ শীজিন্নরিবা পোৎচৈশিং পুম্নমকসি মপালদগী পুশিল্লকপা ঙাক্তা ওইরি৷ চাবা থকপগী মওংসু মপালগী মওং ওইরক্লে৷ সমাজসিগী কলচর অসি করি ওইশিল্লক্লি৷ পুমওন ওনখ্রগা অমুক লাও খোংলকপা, হোংদোক্ননবা হোৎনদ্রিঙৈদা সমাজসিগী য়াইফনবা খনবশিংনা য়াই নত্রগা য়াদে হায়বদু, অতিয়াদা তাওদুনা চৎলিবা ময়ামদা অমুক্তা লৈমায়দা চৎহনবীয়ু৷ ঐখোয় অয়াম্বগী ৱাখল, থবকসি ইয়া য়াদে৷ ইমুং ইমুংগী অহল লমনশিং মতিক চাবা ৱাৎতুনা , থোক্লোইদবা থৌদোকশিংসি থোক্লিবনি৷ ঐখোয়সি মীতোপ ময়াং মচাশিংনা উশিৎলরোই৷ নুংঙাইতে খল্লুবদা ৷

সমাজসিগী থায়নদগী চৎনরকপা থবক থৌরম পুম্নমক থমসি৷ অঙাং অমনা হেক পোকপদগী চৎনরকপা ষষ্ঠি পুজাগী থায়নগী মওং, লুহোংবগী মওং, শোরাৎনচিংবসি, অহল লমন্না থম্বীরম্বা মওংদুদা পাঙথোকপীয়ু৷ মীতোপকী মওংদা ওন্থোকপীগনু৷ চাওখৎখ্রবা লৈবাকশিংগী চপ চাবা কলচর অমমম থায়নদগী লৈবদু, মখোয় কনানসু থুগায়দে৷ লৈবাক্কী চৎনবী হায়বসি ঙাক্না চৎকদৌবনি৷ কনাগুম্বনা পামদ্রগদি, অতোপ্পা মফমদা তৌরুগদবনি৷ সমাজগী চৎনবী কনাগুম্বা অমত্তনা শিংনরোইদবনি৷ হোংলক্লিবা পুম্নমকসি অফবনি হায়না লৌবদি লানগনি ৷ চাওখৎপা, নুংঙাইবা পেন্নিংঙাই ওইবা থবকশিং হায়বসি থম্মোয় মনুংগী ৱাখল অমত্তা নত্তে৷

সমাজ অসিদা চহী ২০-৩০ ফাওবসিদা অহোংবা মওং মরিল তাদবা য়াম্না উরক্লি৷ ৱাখল য়াওদবা মশাগী ইনকম লৈজদবা মপালগী অরং অরাক ময়াম্না ঙাইহাক্কী কুম্হৈ ওইরগা, উৎচনিংবা থবকশিং য়াম্না পাঙথোক্লি৷ পীকখ্রবা মফমসিদা ঐখোয় মশেল লোইনমক খঙনবা ঙাক্তনি৷ কনাদনো ঐখোয়না উৎলিবসি? শকখঙদবা কনাদনো ঐখোয়না ঐখোয়গী মীরাং কারিবা, সমাজসিগী অমোৎপশিং লোৎননবা হোৎনরিবসি৷ সমাজসি চীনগা খুৎকা মান্নবরা? ইলেক্সনগী মতমদনা সমাজসিগী সিন করি ওইখি? হৌজিক হৌজিক্না করি ওইরি? অহোংবা হায়বসি মীওইবগী পুন্সিনি৷ অদুবু চৎনবী খরদি ঐখোয় পুম্নমক্না ঙাক্না চৎতবা য়াদে৷ অহল লমনগী চৎনবীদি ঙাক্না চৎসি৷

Ads