May 25, 2018/ Todays e-paper

য়ানিংদে হায়দুনা হেক্তমক খুদক্তা পেসেঞ্জর গাড়ি লেপ্পগী খোঙজং তৌফম থোক্তে


9th May 2018

    লৈবাক অসিগী ওইনা চাওখৎলবা সিতিশিংদা নোইজ পোলুসন অমসুং এয়র পোলুসন থিংনবা হায়দুনা সিতিগী এরিয়াশিংদা সিতি বসশিং নত্তনা দিজলগী পেসেঞ্জর গাড়িশিং চেনবা অথিংবা থম্নরিবনি৷ ষ্টেট অসিদসু লৈবাক অসিগী চাওখৎলবা মেত্রো পোলিটান সিতিশিং অদুমক য়ৌদ্রবসু নোংমা নোংমগী লেপ্তনা হেঙ্গৎলক্লিবা দিজলগী পেসেঞ্জর গাড়িশিংদগী থোরকপা মৈখুনা এয়র পোলুসন, অমসুং গাড়িশিং অদুগী মখোলনা নোইজ পোলুসনগী চাং অসি খরা মখৈদি ৱাংলবনি৷ মসিগী মথক্তা ত্রাফিক সিষ্টেম নিংথিনা লৈতবনা অমদি দিজলগী গাড়িশিংগী মরক্তা পেসেঞ্জরশিং ফংনবা হায়দুনা বগল লৌনবদা অমসুং হান্না চৎনবা হায়দুনা লেফ্ট টর্নদা ফাওবা মথোং মরম খঙদনা খামজিনবা য়াওবনা লেফ্ট টর্নদা চৎখিগদবা গাড়ি কয়া অমা ব্লোক তৌশিন্দুনা খুৎশেমগী ওইবা ত্রাফিক জাম থোকহনবা কয়া অমসু য়াওরি৷


অসিগুম্বা কয়া অসিদগী খরদা ওইরবসু শেমদোক্নবা অমদি পোলুসনগী চাং অসি হন্থহন্নবা হায়দুনা ইম্ফাল সিতি মনুংদা দিজল ওটো, টাটা মেজিকনচিংবা চঙহন্দনবা ফিরেপ অমা লৌনরকপা য়াই হায়বা খোঙথাং অমসু লৈরি৷ মদু চপ চানা ইমপ্লিমেন্ট তৌবা নত্রগা তৌদবা হায়বদুসু কম্মিটি অসিনা থা অনী চুপ্না য়েংশিল্লবা মতুংদা করি করম্বা সিষ্টেমনা হেন্না ফগদগে হায়বদুগী সর্ভে রিপোর্ট অমা থাগৎলবা মতুংদা ফাইনেল ওইনা খন্ননবগী হৌজিক হৌজিক তাঙ্কক অমদা লৈরিবনি৷

ষ্টেট অসিদা লাইরিক লাইশু হৈরবা থবক ফংদবা মীওই কয়া অমা মশানা মশাবু থবক পীজনবা হায়দুনা শেন্দাল লম্বী অমা ওইনা দিজল ওটো অমসুং টাটা মেজিক কয়া অমা সার্ভিস তৌরি৷ হৌজিক ফাওবদা ষ্টেট অসিদা দিজল ওটোগী মশিং অসি ১৮,০০০ রোম শুরে হায়বগী রিপোর্টসু লৈরি৷ এয়র পোলুসন অমসুং নোইজ পোলুসন হন্থহন্নবনি হায়দুনা খুদক্তা হেক্তা দিজল পেসেঞ্জর গাড়িশিং সিতি মনুংদা চঙবা য়ারোই হায়রিবসি মরম চাদে, গাড়ি কয়া অমা লোন লৌরগা থৌনরিবনি৷ করিগুম্বা সিতি মনুংদা দিজল পেসেঞ্জর গাড়িশিং চঙহন্দবা তারবদি হেন্না অৱাবা মায়োক্নগনি হায়বসিসু লানবদি নত্তে৷ দিমোক্রেসি চৎপা লৈবাক অমা ওইনা মীয়াম্না দিমোক্রেটিক ওইবা মওংদা খোঙজং চঙশিনবদা অকায়বসু লৈতে৷ সরকারনসু মীয়ামগী খোল্লাও তাফম থোকই৷ করি করম্বনা হেন্না ফগদগে হায়বদুদি নাকল অনীগী ওইনা ফম্মিন্নরগা মদুগী ৱারোইশিন অমা লাক্কদৌরিবনি৷

দিজল ওটো থৌরিবশিংনা শিন্থা লেপ্তুনা খোঙজং চঙশিল্লিবসি ফনমক চুম্বা দিমান্দ অমা ওইরবসু মীয়ামদা মাঙজৌননা খঙহনবা তৌদনা খুদক- খুদক্তা গাড়ি লেপ্পগী খোঙজং চঙশিনবা হায়বসিদি অচুম্বা খোঙথাং নত্তে৷ মখোয়না তাল্লিবা দিমান্দ অদু সরকারদা নত্রগা মীয়ামদরা হায়বদু অসিগুম্বা থৌওং অসিনা ৱাহং অমা ওইহল্লে৷ মাঙজৌননা খঙহনবা তৌদনা খুদক খুদক্তা গাড়ি চেনবা লেপ্পা অসিনা ইমর্জেন্সি ওইবা মরু ওইনা অনা- অয়েক চৎনবা মীওই কয়া অমদদি হেন্না খুদোংথিবা মায়োক্নহনগদৌরিবনি৷ দিমান্দ তৌরিবনি হায়দুনা মীয়ামদা খঙহনবা তৌদনা নিংঙক নিংঙকপা তৌবা অসিনদি খোঙজং অদু নেগেটিভ ওইবা মায়কৈ অমদা চৎখিবসু য়াই৷

লৈবাক অসি রুল ওফ লোগী মখাদা লৈবনা কনাগুম্বা মীওই অমা নত্রগা কাঙলুপ অমনা নিংঙক নিংঙকপা মওংদা থবক তৌবা হায়বসি অাইনগী মীৎয়েংদা লাল্লি৷ মরমদি মীয়ামশিং অদুগী ফংফম থোকপা হক অমসু লৈরি৷ মসিগী মথক্তা লো কোর্ট হায়বা অমসু লৈবনা কনাগুম্বশিংনা হেন্না থম্মোয় শোকখিবা য়াওদুনা কোর্টতা চৎখ্রবদি মদু থেংননবা হোৎনবদা অৱাবা অমা ওইগদৌরিবনি৷ নেস্নেল গ্রিন ত্রিব্যুনেলগী মতুং ইন্না দিজলগী গাড়ি অমদগী থোরকপা পোলুসন অসি পেত্রোল গাড়ি ২৪, অদুগা সিএনজি গাড়ি ৪০গা চপ মান্নৈ হায়রি৷ মসিমক্না দিল্লিগী সিতি এরিয়াদা দিজল ওটো চঙহনবা থিংলিবদুগী মথক্তা চহী ১০শুরবা দিজলগী গাড়িশিং বেন তৌগদবনি হায়বা নেস্নেল গ্রিন ত্রিব্যুনেলগী ওর্দর অদু রিভিয়ু তৌনবা সেন্টরনা খঙহল্লবা ফাওবদা রিজেক্ট তৌখিবনি৷ দিল্লিগী চিফ মিনিষ্টর অার্বিন কেজ্রিৱালনা মতম মতমগী ওইনা পোলুসন থিংনবা হায়দুনা নেস্নেল গ্রিন ত্রিব্যুনেলনা লৌখৎলকপা থৌরাংশিং রিভিয়ু তৌনবা হায়বদা য়াদবগী ৱাথোক কয়াসু লৈরিবনি৷ অদুনা ষ্টেট অসিদসু কনাগুম্বা মীওই অমনা নেস্নেল গ্রিন ত্রিব্যুনেলদা নোইজ পোলুসন অমসুং এয়র পোলুসন থিংননবা সিতি মনুংদা মথৌ তাবা থবকশিং পায়খৎপীয়ু হায়না ৱাকৎলকপদা হেন্না খুদোংথিবা অমা মায়োক্নরোই হায়নিংঙাই লৈতে৷

অসিগুম্বা কয়া অসি লৈবনা সরকারগী ফিরেপ অসি হন্দোক্নবা পেসেঞ্জর দিজল ওটোশিং অমসুং অতৈ গাড়িশিংনা দিমান্দশিং তৌবদা য়ারিবমখৈ মীয়ামদা মাঙজৌননা খঙহল্লবা মতুংদা মখোয়গী ওইবা দিমান্দশিং অদু দিমোক্রেটিক ওইবা মওংদা তৌবীয়ু৷ সরকার অমা হায়বসি মীয়ামগীনি৷ মীয়ামগী ৱাকৎ সরকারনা তাদবা তৌরোই৷ তৌবতবু চুম্মী হায়দুনসু মীয়ামগী থম্মোয় শোক্কদবা তৌনিং- তৌনিংবতা তৌবনদি অচুম্বা মায়কৈ অমদা চৎপগী মহুৎতা নেগেটিভ ওইবা মওং অমদা চৎখিদুনা পাম্লিবা পান্দম অদু ফংখিদবা য়াই৷ অদুনা দিমান্দ তৌবদা মীয়ামগী সপ্পোর্ট ফংনবা অমদি সরকারদসু হেন্না ইফেক্তিভ ওইগদবা মওংদা তৌবীয়ু৷ সরকারদা হকথেংননা চৈফু পীনবা হোৎনবগী মহুৎতা মীয়ামদা ওনশিনবা মানবা থৌওংদি তৌদবনা চুমগনি৷

Ads