May 25, 2018/ Todays e-paper

নেরোকা এফ সি না এএফসি গ্রাস রুট দে ২০১৮ গী থৌরম পাংথোকখ্রে


15th May 2018

থৌদাং পাউমীদগী

ইম্ফাল, মে ১৫ঃ এসিয়ান ফুটবোল কনফিদরেসন (এএফসি) গী গ্রাস রুট দে ২০১৮ গা মরী লৈননা ঙসি অয়ুক পুং ৮ তাবা মতমদা নেরোকা এফ সি না শিন্দুনা এ এফ সি গ্রাস রুট দে থৌরম অমা ইম্ফালগী সঙাকফমদা লৈবা দোন বোস্কো গ্রাউন্দদা পাংথোকখ্রে৷

ঙসি পাংথোকখিবা গ্রাস রুট দে দা নেরোকা এফ সি গী গ্রাস রুটতগী হৌরগা সেনিয়র শান্নরোইশিংনা শরুক য়াখিবা অদুদা য়ু-১২, য়ু-১৩, য়ু-১৫, য়ু-১৮ অমদি য়ু-২০ গী মনুংদা লৈবা শান্নরোই ২৫০ রোম্না শরুক য়াখি৷

থৌরম অদুদা নেরোকা এফ সি গী ভাইস প্রসিদেন্ট অবুংজম ব্রজামনি, হোনররি জেনরেল সেক্রেটরি মোইরাংথেম মনিমোহোন, নেরোকা এফ সি গী মেম্বর সিনাম প্রিতম অমদি নেরোকা এফ সি গী মেম্বর টি ঐচ অরুনকুমার লোয়ননা নেরোকা এফ সি গী অতৈ-অতৈ মরুওইবা থৌমীশিংসু শরুক য়াখি৷

গ্রাস রুট দেগা মরী লৈননা নেরোকা এফ সি হোনররি জেনরেল সেক্রেটরি এম মনিমোহোননা ফোংদোকখিবদা নেরোকা এপ সি না অাই-লিগ চংখ্রবা মতুংদা ঙসি ৩শুবা এএফসি গী মতুং ইন্না ওল ইন্দিয়া ফুটবোল ফেদরেসনগী মীৎয়েং মখাদা লৈরিবা ক্লব অসিনা গ্রাস রুট দে অসি চত্থরকপনি৷ মতম মতমগী এ এফ সি গী রুট মতুং ইন্না এ অাই এফ এফ কী ইনষ্ট্রক্সনদা পাংথোক্লিবা গ্রাস রুট দে গী নুংগী ওইবা ৱাখল্লোন্দদি শান্নবা হায়বসি গ্রাস রুটতগী মখোং শেংনা শেমগৎলপগী ৱাখল্লোন অদুনি৷

মহাক্না মখা তানা হায়, নেরোকা এফ সি দা হৌজিক হৌজিক গ্রাস রুট শান্নরোই ১০০ রোম হান্না থমগে খল্লম্বনি৷ অদুবু হৌজিক্তী নেরোকা এফ সি দা পুন্না শান্নরোই ৩০০ গী মথক্তা রেজিষ্টার তৌই৷ লাইবক ফবা অমনা হন্দক্তা য়ু-১৫ গী য়ুথকী টিমদগী ইন্দিয়াগী কেম্পতা শান্নরোই ৩ নেরোকা এফ সি দগী সেলেক্সন তৌখি৷ অদুবু সেলেক্সন তৌখিবা শান্নরোই ৩ দুগী মনুংদা অনি অমদি ফাইনেল সেলেক্সন ফংদুনা গোলকিপর অমগা ফোরৱার্দ শান্নরোই অমমম খন্দুনা ইন্দিয়াগী য়ু-১৫ গী য়ুথকী কেম্পতা লৈরে৷ অদুগা য়ু-১৮ গীদসু শান্নরোই অমা অনিদি শোয়দনা কৌরক্কনি হায়বগী থাজবা থম্মী হায়খি৷ লোয়ননা য়ু-১৩ গী অাই-লিগ জোনেলগী ওইনা নেরোকা এফ সি না সেকেন্দ তাই৷ হায়রিবশিং অসিদগীসু শান্নরোই অনি অহুমদি শুংশোই শোয়দনা ইন্দিয়াগী কেম্পতা পুরকপা য়াবগী তাজবা অদু য়াম্না চাওনা লৈ হায়না ফোংদোকখি৷

ঙসি পাংথোকখিবা গ্রাস রুট দে থৌরমদা এএফসি-এ গী সি ঐচ শান্তিকুমার, এএফসি-বি গী সাপম প্রেমকুমার, এএফসি-সি গী এম রোবিন, এএফসি-দি গী জুন জুন বোরা লোয়ননা নেরোকা এফ সি গী এক্স প্লেয়র ৱাই রাজু, এস থোমাস, এন জি তোন্দোনবা, এন জি তোমার্জিৎ নচিংবনা গ্রাস রুট দে দা নেরোকা এফ সি গী গ্রাস রুট শান্নরোইশিংদা কোচ ওইনা তাকপী তম্বীখি৷

Ads