May 25, 2018/ Todays e-paper

সুপ্রিম কোর্টনা সিবিঅাইগী এসঅাইটি দা ফেক এনকাউন্টরদা চেন্নবা ওফিসারশিংগী মমিং য়াওনা সপ্লিমেন্টরি এফ অাই অার ফাইল তৌনবা খঙহনখ্রে


16th April 2018

থৌদাং পাউমীদগী

ইম্ফাল, এপ্রিল ১৬ন্ মণিপুরদা চত্থখিবা ফেক এনকাউন্টরগা মরী লৈননা ঙসি সুপ্রিম কোর্টনা সি বি অাইগী স্পেসিয়েল ইনভেষ্টিগেসন টিম (এস অাই টি)দা ফেক এনকাউন্টরদা চেন্নবা ওফিসারশিংগী মমিং অমসুং অার্মি, অসাম রাইফলস অমসুং মণিপুর পুলিসনা চত্থখিবা খুৎশেমগী ওইবা নোংমৈ কাপ্নবগী থৌদোকশিং অদুদা চেন্নরিবা ওফিসারশিং অদুগী মমিং য়াওনা সপ্লিমেন্টরি এফ অাই অার ফাইল তৌনবা খঙহনখ্রে৷

ঙসি সুপ্রিম কোর্টকী জষ্টিস মদন বি লোকুর অমসুং জষ্টিস য়ু য়ু ললিট অনিগী বেঞ্চনা সি বি অাইগী স্পেসিয়েল ইনভেষ্টিগেসন টিমদা হৌজিক লৈরিবা এফ অাই অার অসিদা ফেক এনকাউন্টরগী থৌদোক অসিদা চেন্নরিবা ওফিসার অমদি য়ুনিটশিং অদুগী কম্মান্দিং ওফিসারশিং অদুগী মমিং য়াওনা সপ্লিমেন্টরি এফ অাই অার ফাইল তৌনবা খঙহনখিবনি৷ লোয়ননা কোর্ট অসিনা নেসনেল হ্যুমেন রাইট কম্মিসনদসু টিম অসিদা মতেং পাংনবা খঙহনখ্রে৷

কোর্ট অসিনা হায়খিবদা জুদিসিয়েল ইনক্বারি অমসুং হায় কোর্টকী ফাইন্দিংদা ফেক এনকাউন্টরগী থৌদোকশিং অদুদা চেন্নরিবা অসাম বট্টালিয়নগী য়ুনিটশিং অদুগী কম্মান্দিং ওফিসার অমসুং নোংমৈ কাপ্লিবা ওফিসার অদুগী মমিং পল্লবসু এফ অাই অার অসিদদি হায়রিবা মীওইশিং অসিগী মমিং পন্দে৷ মরম অদুনা এস অাই টিনা চেন্নরিবা পার্সোনেলশিং অদুগী মমিংশিং অদু সপ্লিমেন্টরি এফ অাই অার ওইনা তৌরক্কদবনি৷ এদোভেকেট গুরু মেনেকা শ্বামি, এমিকস পুরিনা হিরম অসিগী মতাংদা মতেং পাংলদুনা হায়খিবদা, মার্চ থাদা এফ অাই অার ১১ রেজিষ্টার তৌখ্রে৷ জুদিসিয়েল ইনক্বারি রিপোর্ট অমসুং হায় কোর্টকী ফাইন্দিংদা মসিদা চেন্নরিবা মমিং মথা অদু পল্লবসু এফ অাই অার অদুদদি মদুদা চেন্নরিবা অার্মি, অসাম রাইফসল অমসুং মণিপুর পুলিসকী পার্সোনেলশিংগী মমিং অমত্তা পন্দে হায়না পুখৎলকখিবা অদুগা মরী লৈননা কোর্টনা দিরেক্সন অসি পীখিবনি৷

এপেক্স কোর্ট অসিনা মখা তানা হায়খিবদা, এস অাই টিনা এফ অাই অার অসিদা চেন্নরিবশিং অদুগী মমিং মথা পন্দবা তারবদি কেস অদুগা মরী লৈননা ন্বা হংগদৌরিবা অসি কনা কনানো হায়না হংখি৷ বেঞ্চ অসিনা নেসনেল হ্যুমেন রাইট কম্মিসন্দসু এস অাই টি না কেস ৪২ অসিগী মনুংদা ১৩ গী ইনভেষ্টিগেসন চত্থরিবা অসিদা মতেং পাংনবা মীওই ৩ থারক্নবা খঙহনখ্রে৷

হিয়ারিং অসিগা মরী লৈননা হ্যুমেন রাইট এলার্টনা থাদোরকপা চেরোল অমনা হায়রিবদি সুপ্রিম কোর্টকী কোর্ট নম্বর ৪ দা ঙসি চত্থখিবা হিয়ারিং অদুদা এমিকস কুরিনা অাগুর্ তৌখিবদা সি বি অাইনা ফাইল তৌরকখিবা অনৌবা এফ অাই অার অদু জুদিসিয়েল ইনক্বারি ফাইন্দিং অসি হান্না তৌখ্রবনি৷ লোয়ননা ফেক এনকাউন্টরগী থৌদোক অদুদা চেন্নরিবা য়ুনিটকী মমিং মথানচিংবসু লোইনা য়াওরবনি৷ মসিদা কম্মান্দিং ওফিসার, নোংমৈ কাপ্পগী থৌদোক অদুদা চেন্নরিবা মমিং মথাশিং অদু লোইনা খঙলবনি৷ অদুবু কেস অসি মাংহন্নবা হোৎনবগী শরুক অমা ওইনা সি বি অাই না মশক মমিং খঙদবশিংগী মায়োক্তা ময়েক শেংহনদনা ফাইল তৌই৷ ২০০০গী নভেম্বর ২ দা মালোম মসাকরগী জুদিসিয়েল ইনক্বারিদা থৌদোক অদুদা চেন্নরিবা অসাম রাইফলসকী কম্মান্দর মেজর জোর্জ কৌবা অমগী মমিং পল্লি৷ অদুবু সি বি অাইগী এফ অাই অার অদুদদি মদুগী মমিং পন্দে৷ ২০০৪গী তেজকুমারগী মীহাৎ অদুগী জুদিসিয়েল ইনক্বারিদা মেজর সঞ্জিৎ চোপ্রা অমসুং জে খান ময়েক শেংনা পল্লি৷ অদুবু সি বি অাইগী এফ অাই অার অদুদদি করিমত্তা পনদে হায়না অার্গুমেন্ট পীখি৷ এমিকস কুরিগী অাগুর্মেন্ট অদু তারবা মতুংদা কোর্টনা সি বি অাইদা ফেক এনকাউন্টরগী কেসশিং অদুদা চেন্নবা পার্সোনেলশিং অদুগী মমিং মথা অদু পন্দুনা সপ্লিমেন্টরি এফ অাই অার ফাইল তৌনবা খঙহনখিবনি হায়রি৷

Ads