December 11, 2018/ Todays e-paper

লৈখিদ্রবা অটল বিহারি ভাজপায়িগী উৎ পুরক্তুনা ইম্ফাল তুরেলদা থাদখ্রে ভাজপায়ি কাংলুপকী খেন্নবা থমখিদবা


24th August 2018 |

ঃগভর্নর

থৌদাং পাউমীদগী

ইম্ফাল, অাগষ্ট ২৩ঃ লৈবাক অসিদা ৩ লক প্রাইম মিনিষ্টর ওইরম্বা লৈখিদ্রবা অটল বিহারি ভাজপায়ি লৈবাক অসিবু চাওখৎনবা খনবা, অঙাংশিংবু নুংশিজবা অমদি মীওইবগী মীনুংশি চেনবা অথোইবনি হায়না লৈখিদ্রবা অটল বিহারি ভাজপায়িগী মৈ থাখিবগী উৎ ইম্ফাল তুরেলদা থাদবগী থৌরমদা মণিপুরগী গভর্নর ডাঃ নাজমা হেপ্তুলানা ফোঙদোকখ্রে৷

লৈখিদ্রবা অটল বিহারি ভাজপায়িগী মফমদা অরোইবা ইকায়খুম্নবা উৎতুনা লৈখিদ্রবগী থৱায় য়াওদ্রবা হকচাং মৈ থাবগী উৎতা অরোইবা ওইনা লাইশোল তিনশোলগা লোয়ননা ইকায়খুম্নবা উৎলদুনা ঙসি ইম্ফালগী কোনুং মমাংদা লৈবা সিটি কনভেন্সন্দা পাঙথোকখিবা থৌরম অমদা মণিপুরগী গভর্নর ডাঃ নজমা হেপ্তুলানা মখা তানা হায়, মহাক্না মতম খরা অটল বিহারি ভাজপায়িগা লোয়নরকপদা লুচিংবা অসি থোইদোক হেন্দোকপা মগুনতনা থল্লবা লুচিংবা অমনি৷ মহাক্কী মফমদা রাজনিতিগী অমদি মীওই অমগা অমগগী মরক্তা খেন্নবা লৈতবা অঙাংশিংবু লুনা তৌবা লুচিংবা অমনি৷

মতম অমদা ভাজপায়িনা বিজেপিগী লুচিংবা ওইরিঙৈ অদুগা মহাক্না কংগ্রেস পার্টিদা লৈরিঙৈদা য়ুনাইটেদ নেসন্দা মখোয় অনিনা ভারতকী মীহুৎ ওইনা মফমদুদা লৈপাক্কী ওইবা ৱাফম কয়া থম্মীন্নখি৷ মতম অদুদা ভাজপায়িনা ভারতকী প্রাইম মিনিষ্টরগী ৱারোল থমখি৷ অদুগা মহাক্না মিলিনিয়ন সেসনগী এদ্রেস পীখি৷ মতম অদুদা অটল বিহারি ভাজপায়িনা মঙোন্দা থৌনা কয়া হাপ্পীখি৷ ইং ১৯৮০ দা অটল বিহারি ভাজপায়িনা রাজ্য সভাগী এম পি অদুগা মহাক্না এম পি ওইদুনা নোংমাইজিং খুদিংগী মখোয় অনি অটল বিহারি ভাজপায়িগী ময়ুমদা উন্নদুনা কোফি থকমিন্নদুনা তাথোক তাশিন তৌমিন্নৈ৷ মতমদুদা মহাক্না (ডাঃ নজমা হেপ্তুলা)না অটল বিহারি ভাজপায়িদগী পোলিটিক্সকী ওইবা লাল্লোং কয়া তাকপী তম্বীরম্মী৷ তশেংনমক লৈখিদ্রবা অটল বিহারি ভাজপায়ি লৈবাক অসিদা নত্তনা মালেমগী থাক্তা মমিং লৈরবা লুচিংবা অমা ওইনা মীওইবগী পুন্সিদা থেংনগদবা থাজদবা পাউতাক পাউজেল কয়া তাকপী তম্বীরম্মী৷ তশেংনমক্তি অটল বিহারি ভাজপায়িনা বিজেপিনি অদুগা মহাক্না কংগ্রেস পার্টিনি৷

অটল বিহারি ভাজপায়িনা বিজেপি অদুগা মহাক্না কংগ্রেস পার্টি ওইজরবসু অটল বিহারি ভাজপায়িনা মহাকপু ইমুং মনুংগী মচা মশুগুম্না লোইনবীদুনা হিরম কয়াদা তাকপী তম্বীরম্মী৷(মখা লা ৪দা)

Ads