May 25, 2018/ Todays e-paper

২০শুবা চেল্লেঞ্জ কপ ভেটরান ফুটবোল টুর্নামেন্টগী সেমি ফাইনেল লাইন অপ লোইখ্রে


15th May 2018

থৌদাং পাউমীদগী

ইম্ফাল, মে ১৫ঃ মণিপুর ভেটরান ফুটবোল এসোসিয়েসন্না শিন্দুনা মমাং থাগী ২৯ দগী হৌদুনা ইম্ফালগী মপাল কাংজৈবুং অমদি খুমন লম্পাক অার্টিফিসিয়েল টফ গ্রাউন্দদা পুন্না টিম ১৫ না গ্রুপ-৩ দা শরুক য়াদুনা ক্বার্টর ফাইনেল নোক অাউট ষ্টেজদগী মপান লমগী টিম অমা য়াওনা পুন্না টিম ১৬ না শরুক য়ারগা চত্থরিবা ২০শুবা চেল্লেঞ্জ কপ ভেটরান ফুটবোল টুর্নামেন্ট ২০১৮ গী ঙসি শান্নখিবা ক্বার্টর ফাইনেল মেটচতা লাঙ্গোল এফ সি অমদি এস ঐচ দি এস ভি এ কাংপোকপী টিম্না মায় পাক্তুনা সেমি ফাইনেল লাইন অপ লোইখ্রে৷

ঙসি অহানবা গ্রাউন্দদা শান্নখিবা অহুমশুবা ক্বার্টর ফাইনেল মেটচতা লাঙ্গোল এফ সি না য়ুনাইটেদ ভেটরান কোলকাটাবু পেনাল্টি মার্কতা গোল ৭-৬ তা মায়থিবা পীরগা সেমিফাইনেল চংবা ঙমখিবনি৷ টিম অনিমক্কী শান্নরোইশিং অমত্তা মেটচকী অপিবা মতম লোইবা ফাওবদা গোল অমত্তা চন্নবা ঙম্নদনা লৈখি৷ টিম অনিমক্কী মরাইবক লেপ্নবগীদমক রেফরিনা কিকস ফোর্ম পেনাল্টি মার্ক কাওনবগী দিসিজন লেপখি৷ পেনাল্টি কিকর ১১৷ ১১ কাওনখিবদা য়ুনাইটেদ ভেটরান কোলকাটাগী মাইকৈদগী কিকর তরুক্না গোল অমমম ওন্থোকপা ঙমখি৷ লোয়ননা লাঙ্গোল এফ সি গী মায়কৈদগীসু কিকর ৬ না গোল ওন্থোকপা ঙমখি৷ মখা তানা সদ্দন দেথতা কীক্কর অমমম মখা তানা কাওনবা টিমগী কেপ্টেইনশিংনা শেম শাখি৷ লাঙ্গোল এফ সি গী কেপ্টেইননা হান্না কাওখিবদা গোল ওন্থোকখি৷ অদুগা য়ুনাইটেদ ভেটরান কোলকাটাগী কেপ্টেইন্না গোল পোষ্টকী মথক ৱাংনা লান্না কাওখিবনা মেটচ অদু মায়থিবা নংখিবনি৷

শান্নখিবা মেটচ অদুগী অহানবা হাফ অমদি অনিশুবা হাফকী মতমদা য়ুনাইটেদ ভেটরান কোলকাটানা বোল হেন্না পায়দুনা লাঙ্গোল এফ সি গী মায়োক্তা অখাকপা লৈক্তনা কাউন্টর গোল এটেকশিং চত্থখি৷ অদুবু লাঙ্গোল এফ সি গী গোলকিপর ওইখিবা লোকেশ্বরনা মহাক্কী ফজবা পার্ফোমেন্স পীদুনা তৌরকখিবা গোল এটেকশিং সেভ তৌদুনা গোল অমত্তা চনহনবা ঙমদনা য়ুনাইটেদ ভেটরান কোলকাটাগী শান্নরোইশিং নিংবা কায়হনখি৷ লোয়ননা লাঙ্গোল এফ সি গী গোল কিপরনা কিকস ফোর্ম পেনাল্টি মার্কতসু পেনাল্টি কিক কাওরকখিবা বোল কয়া সেভ তৌদুনা ফজরবা পার্ফোমেন্স কয়া উৎখি৷

অনিশুবা গ্রাউন্দগী মেটচ ওইনা অরোইবা ক্বার্টর ফাইনেল মেটচ শান্নখিবদনা এস ঐচ দি এস ভি এ কাংপোকপীনা এফ সি ই অাই এম অাই গেম ভিলেজবু গোল ৪-১ দা মায়থিবা পীখি৷ মেটচ অদুদা মায় পাকখিবা এস ঐচ দি এস ভি এ গী মায়কৈদগী চনখিবা গোলশিং অদু লামখোলেননা ৭শুবা অমদি ৩৫শুবা মিনিটতা গোল অনি অমসুং ঙামখোসাৎনা ৮শুবা অমদি ৫৪শুবা মিনিটতা গোল অনি চন্দুনা চাওনা মায় পাক্তুনা সেমি ফাইনেল চংবা ঙমখিবনি৷

শান্নখিবা মেটচ অদুদা মায়থিহৌরবা এফ সি ই অাই এম অাই গী মায়কৈদগী অমত্তা ঙাইরবা গোল অদুনা জাংমিনলেন গুইটেনা অনিশুবা হাফ মতুংগী ৪০শুবা মিনিটতা গোল অদু চনবা ঙমখিবনি৷ মেটচকী অপিবা মতম লোয়দুনা অহেনবা ইঞ্জুরি টাইম হাপ্তুনা শান্নখিবদা শোত্থনা লৈরিবা গোলশিং অদু হন্দোকপা ঙমদনা এফ সি ইঅাইএমঅাই না এস ঐচ দি এস ভি এ গী মখুৎতা গোল ৪-১ দা মায়থিবা নংদুনা সেমি ফাইনেল চংবা ঙমদনা লৈহৌখিবনি৷

হয়েংগী মেটচ লৈরোই৷ লাক্লিবা তাং ১৭ কী নুংথিল পুং ১.৩০ তাবা মতমদা চজিং এফ সি অমদি লিলোং এফ সি না অহানবা সেমি ফাইনেল মেটচ শান্নরগনি৷ অনিশুবা গ্রাউন্দগী মেটচ ওইনা নুংথিলগী পুং ৩ তাবদা লাঙ্গোল এফ সি অমদি এস ঐচ দি এস ভি এ কাংপোকপীনা অনিশুবা সেমি ফাইনেল মেটচশিং শান্নরগনি৷

Ads