May 25, 2018/ Todays e-paper

ত্রাই হিষ্টোরিকেল কেতেগোরি অমনি


13th May 2018

ভোরোত সনসম -

হৌখিবা চহী খরা অসিদা মণিপুরদা খুন্দারিবা মৈতৈশিং অসি ভারত সংবিধান্না শক খঙবা ত্রাইব অমা ওইনবগী ঈহৌ কন্না চঙশিল্লকখ্রে৷ হৌজিকসু চঙশিল্লি৷ ওইনবগীনি হায়বা মরম কয়া অমা পীনখ্রে, পীনরি৷ নাকল অমদা ওনবা পামদবা, ওইফম থোক্তে হায়বা কয়াগী ৱারোল কয়াসু তাখ্রে৷ মদুগী অচুম চুমদা য়ানিংবা য়ানিংদবা পাবীরিবা নৈনবীরিবা মীয়ামদা ইশাগী ফিরেপ লৈবীরম্লগনি, মদোমদা নৈনজরোই, নৈনবগী ইতিকসু লৈজদে৷ অদুবু ঐনা থেংনজরুবা, ঐনা থাজজবা ৱাফম অমখক্তং খন্নবা নৈনবা য়াগদ্রা থমজগে৷

মীওইবা ঐখোয়গী পুন্সি অসি মতমনা পুরকপা অহোংবা কয়াদা য়ুম্ফম ওইরগা অঙাং ওইরিঙৈ, পুঙকক চাউরকপা, মপুং মরৈ ফারকপা মীয়াই চল্লকপা অহল ওইরকপা হায়বনচিংবা তাঙ্কক কয়া খায়দোকই৷ তাঙ্ককশিং অসিদা থোল্লিবা মমিংশিং অসি পোৎ অদুনা ওইরিবা ফিভম অদুগা চাননা মদুবু মশক খঙনবা পীবা মিংথোন্নি৷ পোৎ অমত্তদা মতমনা পুরক্লিবা অহোংবদুনা হোংহল্লকপা হোংবা নাইবা মমিংনি৷ অসুম্না মতমগী মতুং ইন্না হোংবা নাইবা মমিংশিং অসিবু হিষ্টোরিকেল কেটেগোরি হায়না খঙনৈ৷ নাকল অমরোমদা হিষ্টোরিকেল কেতেগোরিশিং অসি অকক্নবা মতমগী তাঙ্কক অমগীনি, অনৌবনা লাক্কনি, অরিবনা চৎখিনি৷ অঙাংগী মতম লোইরগা পুঙকক চাউরকপা, মদু লোইরগা পাখঙ ফারকপা মথং মথং অসুম লাক্কনি৷ অদুবু ঐখোয়না নীংশিংগদবদি তাঙ্কক অনী তাইনফম অসি লৈই অমনা ময়েক শেংনা খায়দোকপা য়াবা নত্তে, অঙাং ওইবগী মতৌ মদু তপ্না তপ্না পুংকক চাউবগী মতৌনা শীজিল্লকপনি, পুংকক চাউবা মতৌ অদুবু অমুক মপুং মরৈ ফারকপগী মতৌনা তপ্না তপ্না মহুৎ শিল্লকপনি, তপ্না তপ্না অসুম ওল্লকপনি৷ ইভোলুস্নরি প্রোসেস অমনি৷ মসি নেচরেল লো অমনি৷ কনাসু থিংবা ঙমদে, কৈদৌঙৈদসু ঙম্লোই, মীওইবগী অনীংবা অপাম্বগী ৱাংমদা লেপ্তনা চত্থরিবা পরিং নাইবা খোঙচৎ অমনি৷ অসিগুম্বা খোঙচৎ অমদা চত্থরিবা ফুরুপশিংগী চাওখৎপগী শাংলবা খোঙচৎদা লৈরিবা তাঙ্কক অমদা মাগী থাক অদুগা চান্ননা পীবা মিংনি ‘ত্রাইব’ হায়বসি৷

তাইবঙপান্দা লৈরিবা ফুরুপ অচৌবা মচা, চাওখৎপদা খম থেংলবা খুদিংমক ত্রাইব ওইরম্বদগী অসুম অসুম মতমগী খোঙচৎতা ওল্লকখিবা ঙাক্তনি৷ অহানবদা ইমুং, অদুদগী ক্লান, ক্লানদগী ত্রাইব, ত্রাইবতগী কম্ম্যুনিতি, কম্ম্যুনিতিদগী নেস্নেলিতি, নেস্নেলিতিদগী নেসন মথং মথং কৈরাক কাবগুম কাখৎখিবনি৷ অদুনা ত্রাইব হায়বসি ফুরুপ অমগী মপুন্সিদা চাউখৎপগী থাক নেম্লিঙৈ তাঙ্কক অমদা পীবা মমিংনি৷ ফুরুপ অদুনা চাউখৎপগী থাক ৱাংখৎলক্লবদি ত্রাইব ওইররোই, অমুক হঞ্জিন্দুনা ওনবা হায়বা লৈররোই৷ অসুম্না মালেমগী চাউখৎ খোঙজেলদা মাঙজিল থাখ্রবা য়ুরোপ্তা ত্রাইব হায়বসি শুকলৈমক লৈত্রে হায়না লৌনরে৷ য়ুএসতসু ত্রাইব হায়বা ৱাহৈসি শীজিন্নখিদ্রে৷ চাউখৎপা ৱাৎহৌরিবা এরিয়াশিং (ফুরুপ নত্তে) খন্দোক্তুনা চিংখৎনবা থৌরাং কয়াদি পায়খৎলি৷ মদুসু মতম খরতগীনি, হায়বদি এরিয়া অদু ময়ামগী ওইবা লেবেলদা লৈরক্ত্রিবা ফাওবতগীনি৷ অসিগুম্বা হিষ্টোরিকেল কেতেগোরি অসিবু ৱাহন্থোক পীবদা ময়েক শেংদবদগী ঙসি ভারত্তা ৱাথোক কয়াগী হৌরকফম মরু (রুট) ওইহল্লে৷

ত্রাইব হায়বসি হিষ্টোরিকেল কেতেগোরিনি, ফুরুপ অমগী পুন্সিগী হৌরকপগী তাঙ্কক অমদা পীবা মমিংনি হায়বা য়ানিংলগদি হৌজিক ভারত সংবিধান্না লৌরিবা ত্রাইবকী ৱাহন্থোক অসিগদি তাইওন্নরে৷

অহানবদা ভারতকী সংবিধান্না ফুরুপ কয়া অমবু ত্রাইবনি হায়না শক খঙলি, অদুবু অনটিল এন্দ অনলেস হায়বা ৱাফমসিদি পন্দে৷ অদুনদি ফুরুপশিং অসি ত্রাইব ওইদুনা চহী চা, লীশিং কয়া অদুম লৈবা তারি? ফুরুপশিং অসিবু ত্রাইবনি হায়না শক খঙনবদা শীজিন্নখিবা ক্রাইটেরিয়াশিং অদু চহী দিকেদ কয়াগী মতুং, মতমনা অহোংবা কয়া পুরকখ্রবা মতুং, ইনফোর্মেসন টেক্নোলোজি এজ অসিদসু অসুম চান্নরিব্রা, হোংবা নাইদনা অদুমক লৈরিব্রা? নেচরেল লো অমগী মতুং ইন্না সোসিও- ইকোনোমিক কন্দিসনগী মখা পোন্না হিষ্টোরিকেল কেতেগোরি অমবু ফুরুপ অমগী মমিংদা পার্মিনেন্ট ওইনা নপশিনবসিবু কয়াম কুইনা চুম্মী হায়না লৌখিসিগে?

অসিগুম্বা অরানবা কনসেপ্ট অসিনা মিরাং ওইদুনা ভারতপু ফাজিন পুনশিন্দুনা থম্লি, ভারতপু দিভলপ্পিং কন্ত্রি হায়বা লেবেল অসিদগী হেলহন্দ্রি৷ ভারতকী সংবিধান শেমদোক্তুনা ত্রাইব অমসুং মসিগা হায়রপ মান্নবা কাষ্ট হায়বা অনীসি ভারতকী লৈমায়দগী মুত্থৎখিদ্রিবা মখৈদি লেবেল অসিদগী কৈদৌনুংদা হেঙ্গৎপা ঙম্লোই, চাওখৎলবা ভারত ওইরকপা ওইথোক্লোই৷

অসিগুম্বা অরানবা কনসেপ্ট অমদগী মতম খরা চৎননবগীনি হায়দুনা শেমখিবা শোত্থহৌরবশিংবু চিংখৎনবনি হায়না চত্থরিবা ভারতকী রিজার্ভেসন পোলিসি অসিসু কাষ্ট লাইনদা চত্থরুবনা পার্মিনেন্ট পোলিসি ওন্থোকখ্রে৷ রিজার্ভেসন পার্মিনেন্ট তাখ্রে৷ চহী চা কয়া লৈরবসু রিজার্ভেসন তোকপগী ৱা লৈরোইদৌরি৷ অসিগুম্বা মওং উনরকপদগী রিজার্ভেসনগী দাবী তৌখৎনরক্লি, লৈঙাকপশিং মকোক শারি৷

অসিগুম্বা অরানবা কনসেপ্ট অসিদগী ফুরুপ অমবু পাক্তক্ননা ত্রাইবনি, শোত্থহৌরবনি হায়না শক খঙজিনবা, ইকোনোমিক ক্রাইটেরিয়া হাপ্তুনা অথিংবা থম্বা লৈতবনা শোত্থহৌরবশিং চিংখৎনবনি হায়দুনা পীরিবা খুদোংচাবশিং অসি ফুরুপ অদুগী মনুংদা লৈরিবা ইলাইট কাঙবুনা হঞ্জিন হঞ্জিন লৌদুনা লৈরি৷ এমএলএ, মন্ত্রি, অাইপিএস, অাইএএস ওফিসার ওইরবশিং, লুপা ক্রোরদা খুজিং ওইদুনা পায়রবশিংগী ইমুং মনুংগী মশিংসু ত্রাইবনি হায়দুনা খুদোংচাবা অসুম লৌবসিবু অচুম্বনি হায়না খনবীব্রা? মসিদি শোত্থহৌরবশিং চীংখৎপা নত্তে, য়াইতোংবা খরা শেম্বগী থৌশিলনি৷ খুদোংচাবা ফংদুনা চাউখৎলবা কাঙবুদুনা ত্রাইবকী মিংদা খুদোংচাবা অসুম লৌদুনা লৈরবনিনা ত্রাইব চিংহৌদ্রবা খুদোংচাবা ফংবা ৱাৎহৌরবশিংসু ত্রাইব ওল্লগে হায়রকফম থোক্তবরা?

অদুনা লোইশিল্লকপদা, ত্রাইব হায়বসি হিষ্টোরিকেল কেতেগোরিনি, রিজার্ভেসন হায়বসিসু হিষ্টোরিকেল কেতেগোরি অমা ওইগদবনি৷ মথৌ তারিবদি ভারতকী সংবিধান শেমদোকপনি, ফুরুপ অমবু ত্রাইবনি, কাষ্টনি হায়না শক খঙলিবসি হোংদোকপা, সোসিও-ইকোনোমিক ক্রাইতেরিয়াদা য়ুম্ফম ওইদুনা রিজার্ভেসন পোলিসি চৎনহনগদবনি৷

Ads