May 25, 2018/ Todays e-paper

সরকারনা পায়খৎলিবা স্কিমশিংগী বেনিফিসরিশিং ফংহনবগী মিংদা মরক্তা শেল চাবা কাংবুশিংদগী চেকশিনবিয়ুঃরোবিন্দ্রো


15th May 2018

থৌদাং পাউমীদগী

ইম্ফাল, মে ১৫ঃ সরকারনা পায়খৎলিবা স্কিম প্রোজেক্টশিংবু বেনিফিসরিশিংদা ফংহনবগী মিংদা মরক্তা শেল চানবা হোৎনরিবা কাংবুশিংদগী মীয়াম্না চেকশিনবিয়ু হায়না মণিপুর লেজিসলেটিভ এসেমব্লিগী দিপ্যুটি স্পিকরসু ওইরিবা ময়াং ইম্ফাল কেন্দ্রগী এমএলএ কোংখাম রোবিন্দ্রোনা ফোঙদোকখ্রে৷

ঙসি ময়াং ইম্ফাল বজারদা লৈবা মল্টিপর্পোজ কম্ম্যুনিতি হোলদা খুঙ্গং চৎসি মিসনগী শরুক অমা ওইনা কেন্দ্র অসিগী মনুংদা লৈবা উজৱালা স্কিমগী মখাদা ইমুং ৯২ দা লেম্না এলপিজি গ্যাস কন্নেক্সন, এমওবিসিগী মখাদা লায়রবা ইমুং ১২ দা ইমব্রোইদরি মেছিন অমসুং চিফ মিনিষ্টরগী হকশেলগী তেংবাং কার্দ ফংবা য়ারবা ইমুং ৩০০ দা হেলথ কার্দশিং দিপ্যুটি স্পিকর রোবিন্দ্রোনা হকথেংননা য়েন্থোকখ্রে৷

সরকারগী ওফিসিয়েল কয়া য়াওনা পাঙথোকখিবা থৌরম অদুদা বেনিফিসরিশিংদা কান্নবশিং অদু ফংহল্লদুনা দিপ্যুটি স্পিকর কোংখাম রোবিন্দ্রোনা হায়, ভারতকী প্রাইম মিনিষ্টর নরেন্দ্র মোদিনা এলপিজি গ্যাস কন্নেক্সন থোংদ্রিবা লায়রবা ইমুংশিংদা এলপিজি গ্যাস সিলিন্দর য়াওনা কন্নেক্সন লেম্না ফংহনবা অসিদা কনাগুম্বা খরনা শেল লৌরে হায়বগী পাউ অমা তারে৷ মসি লাইবক থিবনি৷ মহাক্কী কেন্দ্রগী মনুংদা লৈরিবা উজৱালা স্কিমগী মখাদা এলপিজি গ্যাস কন্নেক্সন লৌরিবা ইমুংশিংদা কনাগুম্বা ওফিসিয়েল অমত্তদা শেল পীবা তৌবিগনু৷

ভারত সরকার অমসুং মণিপুর সরকারনা পায়খৎলিবা তোঙান তোঙানবা স্কিম প্রোগ্রাম কয়াগী কান্নবশিং বেনিফিসরিশিংদা ফংহনবা মতমদা কনাগুম্বা ওফিসিয়েলশিংনা শেল পীনবা হায়রক্লগদি খুদক্তা ওফিসার অদুগী মমিং মথা খঙজিনবিদুনা ঐহাক্কী মফমদা খঙহনবীরকউ৷ মতিক চাবা এক্সন লৌখৎচগে হায়খি৷

উজৱালা স্কিমগী মখাদা লেম্না গ্যাস কন্নেক্সন লৌনবা হোৎনবদা এজেন্সিশিংদা নত্রগা কনাগুম্বা অমত্তদা শেল অমত্তা পীবিগনু৷ সরকারনা পায়খৎলিবা স্কিম প্রোজেক্টশিংবু বেনিফিসরিশিংদা ফংহনবগী মিংদা মরক্তা শেল চাবা কাংবু লৈবদগী মীয়াম্না চেকশিনবিয়ু৷

মতম অমদা ওল্ড এজ পেন্সনগী শেনফম অসি শেল ওইনা পুরক্লগা য়েল্লম্বা অদু হৌজিক লৈরিবা সরকার অসিগী মতমদদি পেন্সনরশিং অদুগী বেঙ্ক একাউন্টতা হকথেংননা সরকারনা হাপ্লক্লে৷ হান্না ওল্ড এজ পেন্সন য়েনবগী মিংদা কনাগুম্বা খরনা শান্ননিংবা মওংদা শান্নরম্বা শেনফম শুনা ওল্ড এজ পেন্সনরশিং অদুনা ফংলমদবা কয়া অদু হৌজিক লৈররোই৷

ওল্ড এজ পেন্সন স্কিমগী মিংদা অখুবা রাজনিতি শান্নরম্বা কয়া অদু হৌজিক লৈরিবা চিফ মিনিষ্টর এন বিরেননা লুচিংবা সরকার অসিগী মতমদা মদু লৈররোই৷ মমাংগী সরকারগী মতমদা পীরম্বা ওল্ড এজ পেন্সন কার্দনি, পেন্সনগী শেনফম ফংদ্রে হায়দুনা ৱাকৎপা লাকপা কয়াসু য়াওই৷ সরকারনা পীবা ওল্ড এজ পেন্সন কার্দ নত্তবা মতম মতম অদুগী সরকারনা ঙাইহাক ঙাইহাক্কী ওইনা পীবা পেন্সনগী কার্দ কয়াসু লৈ৷

ওল্ড পেন্সন কার্দকী শেনফম কায়বদা পেন্সনর অদুনা হকথেংননা অদুমক শেল অদু কায়থোকপা য়ারগনি৷ পেন্সনর মশানা চৎলগা নত্রগা চেক মনা অমদা মশানা শহি তৌরগা মচা নত্রগা মশু থাদুনা বেঙ্কতগী অদুমক শেল কায়থোকহনবা য়ারগনি হায়না দিপ্যুটি স্পিকর রোবিন্দ্রোনা ফোঙদোকখি৷

মমাংদা কেন্দ্র অসিগী ওইনা ওল্ড এজ পেন্সন ফংবা মীওই ৪০০ খরা হেন্না লৈরমখি৷ হায়রিবা ওল্ড এজ পেন্সন ফংবা অহলশিং অদুগী বেঙ্ক একাউন্ট অদুদা চয়েৎনবা কয়া লৈরম্বা অমসুং একাউন্ট কয়া শিদুনা লৈরম্বা থেংনরে৷ মরম অদুনা বেঙ্কতা চৎলগা অনৌবা বেঙ্ক একাউন্ট হাঙদোকপীরো৷ ওল্ড এজ পেন্সনগী ফংদনা লৈরিবা শেনফমশিং ফংনবা হোৎনবিরো হায়খি৷

মহাক্না মখা তানা হায়, হৌখিবা মে ১ দা ইহান হান্না মণিপুরগী চিফ মিনিষ্টর এন বিরেন মশামক ময়াং ইম্ফাল কেন্দ্রদা লাক্তুনা খুঙ্গং চৎসি মিসন হৌদোক্লম্বা নুমিৎতা এমওবিসিগী মখাদা ইমব্রোইদরি মেছিন খরা বেনিফিসরি খরদা পীরম্বা অদুগী ঙসি ইমব্রোইদরি মেছিন ১২, উজৱালা স্কিমগী মখাদা এলপিজি গ্যাসকী কন্নেক্সন লৈত্রিবা ইমুং ৯২ দা এলপিজি গ্যাস কন্নেক্সন, চিফ মিনিষ্টরগী হকশেলগী তেংবাং স্কিমগী মখাদা অনাবা অমনা চহী অমদা লুপা লাক্ষ ২ ফাওবগী শেলগী মতেং ফংবা য়াবা কার্দ নৌনা শারবা ইমুং ৩০০ রোমদা কার্দশিংসু ঙসিগী খুঙ্গং চৎসি মিসন অসিগী মখাদা ময়াং ইম্ফাল কেন্দ্রগী মীয়ামদা য়েন্থোকপনি হায়খি৷

দিপ্যুটি স্পিকর রোবিন্দ্রোনা মখা তানা হায়, কনাগুম্বা অনাবা অমনা জেনিমস নত্রগা রিমসতা লায়েংবদা হায়রিবা চিফ মিনিষ্টরগী হকশেলগী তেংবাং কার্দ অদু পায়দুনা লায়েংবা চৎপদা মদুগী কান্নবা ফংদ্রগদি ঐহাক্কী ইফমদা হকথেংননা লাক্তুনা ৱাকৎপীয়ু৷ হকশেলগী তেংবাং কার্দ অদুগী কান্নবা হকথেংননা অনাবশিংদা ফংহনগনি৷

খুঙ্গং চৎসি মিসনগী মখাদা ময়াং ইম্ফাল কেন্দ্রগী মনুংদা লৈবা লায়রবা ইমুং খুদিংমক্তা এলপিজি গ্যাস কন্নেক্সন ফংহন্নবা হোৎনমিন্নসি৷ এলপিজি গ্যাস কন্নেক্সন তৌবগী চে চাং নিংথিনা শুরবা খুদিংমক্তা এলপিজি গ্যাসকী কন্নেক্সন ফংহনগনি৷ হিরম খুদিংদা চাওখৎপা ময়াং ইম্ফাল কেন্দ্র অমা পুরক্নবা পুন্না হোৎনমিন্নসি হায়না এমএলএ কে রোবিন্দ্রোনা ফোঙদোকখি৷

ঙসিগী অদুগুম্লবা খুঙ্গং চৎসি মিসনগী শরুক অমা ওইনা পাঙথোকখিবা বেনিফিসরিশিংদা চিফ মিনিষ্টরগী হকশেলগী তেংবাং কার্দ, উজৱালা গ্যাস কন্নেক্সন ফংহনবা অমসুং ইমব্রোদরি মেছিনশিং য়েন্থোকপগী থৌরম অদুদা এমওবিসি, হেলঠ দিপার্টমেন্ট অমসুং এলপিজি গ্যাস কন্নেক্সনগী মতাংদা জিবিদি ইন্দেন সার্ভিসকী প্রোপ্রাইটরনচিংবা অখঙ অহৈ কয়ানা ৱা ঙাংখি৷ থৌরম অদুদা ময়াং ইম্ফাল বিজেপি মন্দলগী প্রসিদেন্ট ইরোম রবি, ময়াং ইম্ফাল ম্যুনিসিপাল কাউন্সিলগী চিয়ারপার্সন অমসুং কাউন্সিল্লরশিংনা শরুক য়াখি৷

Ads