May 25, 2018/ Todays e-paper

দিষ্ট্রিক্ট হোস্পিটাল হোংবগী ৱাথোক অথুবদা লোইশিন্নবা হোৎনবা চুমগনি


10th May 2018

ইম্ফাল ইষ্ট দিষ্ট্রিক্টকী মনুং চন্না লৈবা শগোলমাঙদা দিষ্ট্রিক্ট হোস্পিটাল শাননবা যাত্রা হুল্লম্লবা মতুং হোস্পিটাল অসিগী বাউন্দরি ফাওবা ফেন্সিং তৌরুরগা হৌজিক্না লমগী চয়েৎনবা লৈরি হায়দুনা মফম অদুদা শাগদবা দিষ্ট্রিক্ট হোস্পিটাল কিয়ামগৈদা শারগনি হায়না যাত্রা হুনখিবদগী অচৌবা ৱাথোক অমা ওইরক্লিবসি মণিপুর সরকারনা অথুবা মতমদা লোইশিন্নবা হোৎনফম থোকই৷ মসিদা রাজনিতিগী অমদি দোলা-দোলিগী ওইবা ৱাফম পুম্নমক থাদোক্লগা কমদৌনা লমগী চয়েৎনবা লৈরিবনো অমসুং করিগীদমক্তা মফমসিদগী দিষ্ট্রিক্ট হোস্পিটাল শাননবা ৱারেপ লৌরম্বদগী হন্দোকখ্রিবনো হায়বদু মমুৎ তানা থিজিনবা চুম্মী৷ মণিপুরসি মরম অমদগী মরম অমদা পুথোক্লগা ৱাথোক ওইহন্নবা হোৎনবা মীগী মশিংসি অদুক্কী মতিক য়াম্মী৷ পোলিটিক্স তৌরিবনি হায়দুনসু পোলিটিক্সকী চপ চাবা ৱাহন্থোক্তু খঙলগা পোলিটিক্স তৌনদ্রবনিনা ৱাথোক্তি অদুমক মশানা লাকপা তাবনি৷ মসিদা কনানা কনাদসু ব্লেইম তৌনিংঙাই মরম লৈতে৷ হৌজিক লাক্লিবা ৱাফমদি শগোলমাঙদা দিষ্ট্রিক্ট হোস্পিটাল শাগনি হায়রম্লগা শাদ্রিবা অসি নুংগী ওইবা ৱাহন্থোক করি লৈবগে হায়বদু খঙননবা হোৎনবা তাবনি৷ মেদিকেল দাইরেক্তোরেটতগী ফংবা পাউদদি দিষ্ট্রিক্ট হোস্পিটাল শাগনি হায়রিবা মফম অসিগী শরুক খরা হান্না মণিপুর সরকারগী দাইরেক্তর ওফ হেলঠ দিপার্টমেন্টকী মমিংদা লৈরম্মী৷ সরকারগী ওইনা লৈরম্লবা মফম অদুদা কনানা কমদৌনা লন্নাই মীওই খরগী মমিংদা পাট্টা তাশিন্দুনা মমিং ওনশিল্লম্বনো হায়বসিনি৷ দাইরেক্তর ওফ হেলঠ দিপার্টমেন্টকী মিংদা লৈরম্বা লম অমা কনাগুম্বা মীওইশিংনা লোৎনা নত্রগা ফোঙনা রেভিন্যু দিপার্টমেন্টকী মীওইশিংগা মান্নরগা লন্নাই মীওইদা পাট্টা তাশিনখ্রবা মতুংদা হোস্পিটাল শাননবা থৌরাং তৌরকপদা অচৌবা শেলফম খরা কম্পেন্সেসন ওইনা পীয়ু হায়রকপদগী ৱাথোক অসি লাকপনি হায়না ফোঙদোরকপা লৈ৷


মতাং অসিদা লাক্লিবা ৱাফমদি, সরকারগী মিংদা লৈরম্লবা লমবু লন্নাই মীওইদা মমিং ওনশিন্দুনা পাট্টা তাশিনবা হায়বসি ওইথোকপা য়াবা ৱা রা? লন্নাই মীওইদা পাট্টা তাশিনবদা য়াওরিবা রেভিন্যু দিপাটর্মেন্টকী ওফিসিয়েলশিং সরকারনা এক্সন লৌখৎলোইদবগী মরম লৈব্রা? রেভিন্যু দিপার্টমেন্ট হায়বা দিপার্টমেন্ট অসিদি অদুক্কী মতিক চরক চহিং নাইবা, শেঞ্জা থুমজাতনা হারবা দিপাটর্মেন্ট অমনি হায়বসি মীপুম খুদিংমক্না খঙনরবা ৱাফমনি৷ খোঙবালদা পাট্টা পীবা, ঈশিং মনুংদা পাট্টা পীবা, তুরেল খোঙনুংদা পাট্টা পীবা ঙম্বা দিপার্টমেন্ট অসিদা ওফিসিয়েল কয়া অমা লৈরে হায়বসি ঙসিগী লৈরিবা সরকার অসিনা খঙলগসু মখোয়গী মথক্তা এক্সন অমত্তা লৌখৎপা ঙমদনা লৈরি৷ শগোলমাঙদা দিষ্ট্রিক্ট হোস্পিটাল শাগনি হায়রম্বদগী কিয়ামগৈদা শাননবা হোংদোকখিবগী ৱাফম অসিসু মসিগা হায়ফেৎ মরী লৈনবগুম্না তৌরি৷ হৌজিক্তি শগোলমাঙ অমদি অকোয়বদা লৈরিবা মীয়াম্না পেন্দবগী খোল্লাও কয়া লাওবা হৌরক্লে৷ সরকারনা লৌখিবা ৱারেপকী মায়োক্তা ফোঙনা থোরক্তুনা পেন্দবগী খোল্লাও লাওবা হৌরক্লে৷ মদুদা পুলিসনা ঈরাং থোক্তনবা হোৎনবদা শীজিন্নখিবা টিয়ার গ্যাস অমদি মোব বোমনা পানবদগী অশোক-অপন কয়া অমসু মায়োক্নরে৷ মসিদা শোক্লিবা, অৱা-অনা তারবা ইমা ইবেল অমদি ইচিন-ইনাওশিং অসি চাবা ফাওবা মনিং থুংবা ফংজদ্রবা লমদম অসিগী লৈহাওদা চাওরিবা মীওই ঙাক্তনি৷ রাজনিতিগী কাঙদ্রুম লংনবী অমদি হুন্নবীদা মীয়ামবু খুৎলায় ওইনা শীজিন্নবা চুমদে৷ করিদগী য়াদ্রিবনো হায়বদু মমুৎ তানা মীয়ামদসু খঙহনবা অমা চঙই৷

মণিপুর সরকারসু মতাংসিদা মবুকচেল তিংবা অমদি শেংবা চঙই৷ দিষ্ট্রিক্ট হোস্পিটাল শগোলমাঙদা শাদবা অমদি শেংদোকপগী মতাংদা মমুৎ তানা মীয়াম খঙননবা শেংদোকপগী থবক তৌদে৷ মনুংদা ৱাফম খরা থম্লগা শেংদোকপদুনদি ওইবা য়ারোই৷ মদুনা মীয়ামদা চৈনা পীবগা লোয়ননা ঈরাং হৌরক্নবগী মচাক অমা ওইহল্লি৷ সরকার হায়বসিদি মীয়ামগী মীহুৎনা শেম্বনি৷ মীয়াম ৱাহনগদবা সরকার ওইরগদি লৈতবনা হেন্না ফৈ৷ রেস্পোন্সিবিলিতি লৈবা গভর্নমেন্ট অমগী মথৌদু হৌজিক তৌবা মথৌ তাই৷ মরী লৈনরিবা হেলঠ দিপার্টমেন্টনসু লমগী চয়েৎনবা ৱাফম খুদিংমক পুথোকপগা লোয়ননা দাইরেক্তর ওফ হেল্ঠ দিপার্টমেন্টকী মিংদা লৈরম্বা লমবু মতৌ করম্না লন্নাই মীওইশিংদা মমিং ওনশিন্দুনা পাট্টা তারম্লিবনো হায়বদু থিদোকপগা লোয়ননা মীয়ামদা খঙহনবগী মতম অদু য়ৌরক্লে৷ ‘জষ্টিস দিলে, জষ্টিস দিনাইদ’ হায়বা ৱাফমদু হেলঠ দিপার্টমেন্টনা খঙগদবনি৷ মরী লৈনরিবা হেলঠ মিনিষ্টরনসু মণিপুর সরকারগী চপ চাবা থৌদাং অদু লৌবগা লোয়ননা লন্নাই মীওইদা পাট্টা তাশিন্নবা হোৎনরিবা ওফিসিয়েলশিংগী মথক্তা এক্সন লৌবা য়াননবা অথুবা মতমদা প্রোসেস তৌফম থোকই৷ লোয়ননা দিপার্টমেন্টকী মিংদা লৈরম্বা লম লন্নাই মীওইদা পাট্টা পীশিল্লম্বদু ককথৎলগা দিপার্টমেন্টকী মিংদা হায়রিবা লমদু পাট্টা ওনশিন্নবা হোৎনগদবনি৷ ইম্ফাল ইষ্ট দিষ্ট্রিক্টকী ওইবা দিষ্ট্রিক্ট হোস্পিটাল অমা শগোলমাঙদা শাবা হায়বসি খ্বাইদগী হেন্না মরম চাবনি৷ অদুবু দিপার্টমেন্টকী মিংদা লৈরবা লম অদু করম্বা শক্তিনা করম্বা রাজনিতিগী অকনবা খুৎ য়াওদুনা লন্নাই মীওইশিংদা পাট্টা তাশিনহল্লম্লিবনো হায়বদুগী ক্বেসননি হৌজিক লাক্লিবসি৷ ৱাফম অসি শগোলমাঙ অমদি অকোয়বদা লৈরিবা প্রজা পুম্নমক্তা খঙহন্ননবগীদমক্তা মণিপুর সরকারনা অখন্নবা ষ্টেপ অমা লৌরকপগী মতম অদু য়ৌরে৷ মীয়ামগী মরক্তা ঈ-নাই তানহন্নবা হোৎনবা চুমদে৷ মীয়ামগী খোল্লাও তাবা ঙম্বা সরকার অমা ওইবগী চপ চাবা মথৌদাং পাঙথোকউ৷ মীয়াম্না সরকার অসিদা কি-হঙ্গোইনা য়েংলিবা মীৎয়েং অসি কোকহনগে হায়বা তারগদি হিরম অসিদা মণিপুরগী চিফ মিনিষ্টরনা অখন্নবা মীৎয়েং অমা চঙবগা লোয়ননা অচুম্বা ৱাফমদু মফমসিদা লৈরে হায়বদু মমুৎ তানা তাক্লগদি লৈরিবা মীয়ামগী ঈহৌ অসি হন্থখিগনি হায়না খল্লি৷

Ads