October 22, 2018/ Todays e-paper

কোর্টকী অথিংবা মরক্তা এমওএ গী ইলেক্সন পাঙথোকখ্রে এডুকেসন মিনিষ্টর রাধেশ্যাম এমওএ গী প্রসিদেন্ট খনখ্


19th August 2018 |

থৌদাং পাউমীদগী

ইম্ফাল, অগষ্ট ১৯ঃ মণিপুর ওলেম্পিক এসোসিয়েসনগী একজিক্যুটিভ কাউন্সিলগী ওফিস বিয়াররশিং অমসুং মেম্বরশিং ইলেক্সন তৌদুনা খন্ননবগী এন্যুয়েল জেনরেল মীটিং চয়েৎনবা লৈবদগী কোর্টনা পাঙথোক্তনবা অথিংবা থমখ্রবসু ঙসি মীখল পাঙথোক্তুনা নৌনা থৌ পুগদবা ওফিস বিয়াররশিং খনখ্রে৷

মীখল অসিগা মরী লৈননা এম ও এ গী একজিক্যুটিভ কাউন্সিলগী ওফিস বিয়ারর অসিদা ভাইস প্রসিদেন্টকী মীরেপ ওইরিবা এস মোহেন্দ্রোনা সিভিল জজ, সেনিয়ার দিভিজন ইম্ফাল ইষ্ট ৱাই সোমোরজিৎ সিংহগী কোর্টতা মীখল অসি চয়েৎনবা লৈবনা মতম খরা য়ৈথোক্নবা থারকখিবা পিটিসন অমগা মরী লৈননা ঙরাং কোর্ট অসিনা নাকল অনিমক্কী তংদাংবা ফিভম অমা লাক্ত্রিবা ফাওবগী ওইনা এমওএগী ওফিস বিয়াররশিং অমসুং মেম্বরশিং খনবগী জেনরেল মীটিং অসি পাঙথোক্তনবা ইন্টরিম ইঞ্জঙ্কসন ওর্দর অমনা অথিংবা থমখিবনি৷

নাকল অমদগী লাকপা ৱাকৎ চে অদুগা মরী লৈননা সিভিল জজগী কোর্ট অসিনা জুদিসিয়েল মিসসেনিনিয়স কেস লৌখৎতুনা জেনরেল মীটিং থিংবগী ওর্দর তাখিবগা লোয়ননা থা অসিগী ৩১ দা পাটর্িশিং কোর্টতা লাক্নবা সমোন তৌখ্রে৷ লোয়ননা ইম্ফাল ইষ্ট পুলিস ষ্টেসনগী ও সি অমসুং এম ও এগী সেক্রেটরি জেনরেলদা ওর্দর অসিগী মতুংইন্না দরকার লৈবা থবক পায়খৎনবা কোর্ট অসিনা মখা তানা খঙহনখিবনি৷

অদুমকপু কোর্টকী অথিংবা লৈনা লৈনা ঙসি মণিপুর ওলেম্পিক এসোসিয়েসন (এম ও এ)গী মীখল পাঙথোক্তুনা অয়ুক পুং ১১ দগী নুংথিল পুং ১ ফাওবা ভোট থাদনখ্রে৷ পুন্না এম ও এগী ভোটর ৬৯ লৈবগী মনুংদা ৫৩ না ভোট থাদনখি৷ খুমন লম্পাক্তা লৈবা মণিপুর ওলেম্পিক ভাবন্দা পাঙথোকখিবা মীখল অদুদা প্রসিদেন্টগী মীরেপ ওইখিবা এডুকেসন মিনিষ্টর টিঐচ রাধেশ্যামনা মহাক্কী লম্বা ওইখিবা এক্স মিনিষ্টর বিজয় কোইজমদগী ভোট মশিং ৫০ হেন্দুনা মায় পাকখি৷ অদুগা বিজয় কোইজমনা ভোট ৩খক্তমক ফংখি৷ জেনরেল সেক্রেটরিগী মীরেপ ওইখিবা সুনিল এলাংবম ভোট ৫১ ফংদুনা মায় পাকখি৷ অদুগা মহাক্কী লম্বা ওইখিবা ডাঃ শান্তিকুমারনা ভোট অমখক্তমক ফংখি৷ ত্রেজররগী মীখলদনা ডব্লিউ বাশু দেভনা ভোট ৪৮ ফংদুনা মায় পাকখি৷ অদুগা মহাক্কী লম্বী ওইরিবা ডব্লিউ রঞ্জিৎনা ভোট ৫খক্তমক ফংখি৷

ভাইস প্রসিদেন্টগী মীখলদা পুন্না মীরেপ ৮ লম্বা তৌবগী মনুংদা ৬ মায় পাকখ্রে৷ মায় পাক্লবশিং অদুদি এন অঞ্জিৎ, কে বাসুনি, এন চোরজিৎ, কে জয়ানন্দ, কেঐচ জয়কুমার অমসুং এম রাজচন্দ্রনি৷ (মখা লা ৪দা)

Ads