May 25, 2018/ Todays e-paper

টুয়েল্ব পরিক্ষাদা ১৭ শুবা পোজিসন লেপখিবা বিকিস ময়ুম ফাওবা লৈরমদ্রে


5th May 2018

থৌদাং পাউমীদগী

ইম্ফাল, মে ৪ঃ কাউন্সিল ওফ হায়র সেকেন্দরি এডুকেসন মণিপুরনা লৌবা ঙরাং হায়দোকখিবা টুয়েল্ব পরিক্ষাদা সাইন্স ষ্ট্রিমদা ১৭ শুবা পোজিসন তাখিবা মেক্সি এক্সপ্লোর একাদমি চঙাঙ্গৈ উচেক্কোনগী মহৈরোই শগোলশেম বিকিস ময়ুম ইঙ্খোল ফাওবা লৈরমদ্রে৷ য়াম্না ন্বানা পরিক্ষা অসিদা টুইসন অমত্তা তমদনা ১৭ শুবা পোজিসন্দা লেপ্লকখিবা মহৈরোই ওইরম্লে৷

শগোলশেম বিকিস অপোকপনা সোমা কৌই৷ অদুগা অপোকপীনা কুনোদিনি কৌই৷ মচিন মনাও ৫ পোকপগী মনুংদা মহাক্না ইতোন তোনবনি৷ ময়ুম মকৈ লৈতবদগী মখুরাগী ফার্ম শঙদুনা লাইরিক লাইশু তম্লকখিবনি৷ অপোকপা মপানা নোংমগী অফং অফংবা থবক শুদুনা লৈতা লাইরা তাল্লি৷ অদুগা অপোকপী মমানা হার্ট পেসেন্টনি৷

১৭ শুবা পোজিসনদা য়াওরক্লবা মহৈরোই বিকিসনা ফোঙদোকখিবদা মখোয়গী ময়ুম মকৈ লৈতে৷ মহাক্না হেক মীরোল তারকপদগী মখুরাগী ফার্ম অসিদা লৈরম্লে৷ ২০১৫তা পাঙথোকখিবা মেত্রিক পরিক্ষাদা ন্বাঙু গভর্নমেন্ট হায়স্কুলগী মহৈরোই অমা ওইনা চাদা ৮৬.৩ ফংদুনা গভর্নমেন্ট স্কুলগী মহৈরোইশিংগী মরক্তা খ্বাইদগী ফবা মহৈরোই অমা ওইখি৷ মেত্রিক পরিক্ষা থাবদসু মমান্নবশিংনা টুইসন তম্লবসু মহাক্তি তম্বা ঙমখিদে৷ টুয়েল্ব পরিক্ষা অসিদসু টুইসন তম্বা ঙমখিদে৷ লাইরিক লাইশু তম্বগী বোই ফাওবা লৈনিংঙাই লৈতদুনা থেকচিল্লগা য়াম্না লিক্না শীজিন্নখি৷ অপোকপা মমা মপাদা য়ারিবমখৈ হায়দনবা হোৎনখি৷ মফি মরোল শেৎ চাবদসু মমা মপাদা হায়খিদে৷ য়াম্না ন্বানা মতৈ তমখি৷ মেসিগী ওজাশিংনা হোৎনবীবদগী পরিক্ষা অসিদা ১৭ শুবা পোজিসন য়াওবা ঙম্লকখিবনি৷ মসিগীদমক্তা মেসিগী ওজাশিংবু থাগৎপা ফোঙদোক্লি হায়খি৷

মহৈরোই বিকিসনা মহাক্কী তুংগী পুন্সিদা মেদিকেল লাইনদা চৎতুনা ডাক্টর অমা ওইনা লৈতা লাইরাশিংগী মতেং পাংবা পাম্মী হায়নসু ফোঙদোকখি৷

অপোকপী মমানা থম্মোয় শোক্না কপ্তুনা হায়খিবদা মেত্রিক পরিক্ষা থাবদা টুইসন তম্নবা লুপা ২৫০০ পুথোকপা ঙমদবদগী মচাবু টুইসন তম্বা ঙমহনখিদে৷ হন্দক্কী টুয়েল্ব পরিক্ষা থারমদাইদা মচানা লুপা ২০০খক্তা থারক্নবা হায়বদা মদুসু লৈতবদগী থাবা ঙমখিদে হায়না মথম্মোয় শোক্না কপ্তুনা হায়খি৷

Ads